დღეს,12 აგვისტოს, საქართველოში ამერიკელი სენატორი, რიჩარდ ლუგარი ჩამოდის. როგორც "ჯი-ეიჩ-ენს" აშშ-ის საელჩოდან აცნობეს, რიჩარდ ლუგარი და აშშ-ის თავდაცვის მდივნის თანაშემწე ბირთვული, ქიმიური და ბიოლოგიური პროგრამების განხრით, ენდრიუ ვებერი საზოგადოებრივი ჯანდაცვის ცენტრალური საცნობარო ლაბორატორიისთვის სახელის მინიჭების ცერემონიაში მიიღებენ მონაწილეობას.
საელჩოს ინფორმაციითვე, სენატორი ლუგარი და თავდაცვის მდივნის თანაშემწე ვებერი მონაწილეობას მიიღებენ საქართველოს დაავადებათა კონტროლის ეროვნული ცენტრის ადმინისტრაციული შენობის საძირკვლის ჩაყრის ცერემონიაში.
ლაბორატორიას სენატორი ლუგარის სახელი იმ ღვაწლის აღსანიშნავად მიენიჭება, რომელიც ამერიკელ სენატორს მსოფლიოში ბირთვული, ქიმიური და ბიოლოგიური საფრთხის შემცირების საქმეში მიუძღვის.
აშშ-სა და საქართველოს მთავრობებმა, სენატორების - ნანისა და ლუგარის "საფრთხის შემცირების პროგრამის" ფარგლებში, საზოგადოებრივი ჯანდაცვის ცენტრალური საცნობარო ლაბორატორია ააგეს. ესაა თანამედროვე სტანდარტების დაწესებულება, რომლის მიზანია, გააძლიეროს და განავითაროს საზოგადოებრივი და ცხოველთა ჯანდაცვა ინფექციურ დაავადებათა აღმოჩენის, ეპიდემიოლოგიური ზედამხედველობისა და კვლევის გზით და ამით სარგებელი მოუტანოს საქართველოს, კავკასიის მთელ რეგიონსა და მსოფლიო საზოგადოებას.
წელს აშშ და საქართველო თანამშრომლობის 20 წლისთავს აღნიშნავენ.
საზოგადოებრივი ჯანდაცვის ცენტრალური საცნობარო ლაბორატორია სიმბოლოა იმ მნიშვნელოვანი როლისა, რომელსაც საქართველო შესაძლო საფრთხეებისაგან საკუთარი თავისა და რეგიონის დაცვის საქმეში ასრულებს, აგრეთვე სიმბოლოა იმ თანამშრომლობისა, რომელიც აშშ-სა და საქართველოს შორის ამ უმნიშვნელოვანეს სფეროში არსებობს.
შენობაში ბინას დაიდებს აშშ-ის დაავადებათა კონტროლის ცენტრის, აგრეთვე უოლტერ რიდის სახელობის არმიის კვლევითი ინსტიტუტის ოფისები.
საზოგადოებრივი ჯანდაცვის ცენტრალური საცნობარო ლაბორატორია და საქართველოს დაავადებათა კონტროლის ახალი ეროვნული ცენტრი გახდება რეგიონული სასწავლო ცენტრი, აგრეთვე ეპიდ-ზედამხედველობის ლაბორატორიების გლობალური ქსელის მნიშვნელოვანი ელემენტი, რომლის ფუნქცია შესაძლო ლეტალური შედეგების მქონე დაავადებების ადრეული აღმოჩენა იქნება.
