„ქრისტიან-დემოკრატიული" მოძრაობის აჭარის ორგანიზაციის თავმჯდომარე ნიაზ ზოსიძე სოფელ ჩაისუბნის მოსახლეობას შეხვდა. უმაღლესი საბჭოს თავმჯდომარის მოადგილე ადგილობრივთა პრობლემებს გაეცნო და მათ „ქრისტიან-დემოკრატების" წინასაარჩევნო პროგრამაზე ესაუბრა.
აქ მცხოვრებთა ინფორმაციით მათ უმთავრეს პრობლემას ამორტიზებული ელექტრო გაყვანილობა, ცენტრალური გზის მოუწესრიგებლობა და ნაგვის ურნების უქონლობა წარმოადგენს. ურნების არარსაებობის გამო მოსახლეობა იძულებულია საყოფაცხოვრებო ნარჩენები მდინარეში ჩაყაროს, რაც ბუნებრივია მდინარის დაბინძურებას იწვევს.
ნიაზ ზოსიძის განცხადებით ყველა ის პრობლემა რაც ჩაისუბნელებს აწუხებს მთელი საქართველოს მაშტაბით იდენტურია. მისივე თქმით ხელისუფლება ვალდებულია 4 წელიწადში ერთხელ, არჩევნების დროს მაინც დაინტერესდეს საკუთარი მოსახლეობის ბედით და შეისწავლოს ამ ხალხის რეალური მდგომარეობა.
„აქ მცხოვრებ ადამიანებს გული ტკივათ იმის გამო, რომ მოჩვენებით კეთილდღეობაში უწევთ ცხოვრება. არადა ის პრობლემები, რომლებიც მათ აწუხებთ, ხელისუფლების კეთილი ნება თუ იქნება ადვილად მოგვარდება. უამრავი სოციალურად დაუცველი ადამიანი ელოდება ხელისუფლებისგან დახმარებას, თუმცა სამწუხაროდ მთავრობა მათი კეთილდღეობისთვის არაფერს აკეთებს. " - განაცხადა ჟურნალისტებთან საუბრისას ნიაზ ზოსიძემ.