"რა შუაშია აქ საქართველოს საგარეო საქმეთა სამინისტრო? რუსეთის პრემიერმა სამხრეთ ოსეთის სუვერენული სახელმწიფო მოინახულა, მის ხელმძღვანელობას შეხვდა და მასთან ერთობლივი პროექტები განიხილა", - წერს რუსეთის პრემიერ-მინისტრი დიმიტრი მედვედევი სოციალურ ქსელ "ფეისბუქში" რუსული სააგენტო "რია ნოვოსტის" გვერდზე საქართველოს საგარეო საქმეთა სამინისტროს მიერ გავრცელებული განცხადების კომენტირებისას.
მედვედევის თქმით, "თბილისი რუსეთს ცხოვრებას ნუ ასწავლის".
"დამოუკიდებელი სამხრეთ ოსეთი - ეს არის თანამედროვე საერთაშორისო ურთიერთობათა რეალობა. ეს ქვეყანა რუკაზე ოთხი წლის წინ გაჩნდა მრავალწილად საქართველოს ხელისუფლების მიერ წარმოებული დამნაშავეობრივი პოლიტიკის შედეგად. ვინ ვინ და ეს მოღვაწეები ახლა ჩვენ ცხოვრებას ნუ გვასწავლიან", _ წერს მედვედევი.
შეგახსენებთ, რომ საქართველოს საგარეო საქმეთა სამინისტრომ დღეს გაავრცელა განცხადება, რომელშიც რუსეთის პრემიერ-მინისტრის დიმიტრი მედვედევის ოკუპირებულ ცხინვალის რეგიონში ჩასვლა დაგმო.
"2012 წლის 8 აგვისტოს, პრემიერ მინისტრი დიმიტრი მედვედევი უკანონოდ შევიდა სუვერენული საქართველოს ტერიტორიაზე და ოკუპირებულ ცხინვალის რეგიონს ეწვია. ეს მოქმედება საქართველოს კანონმდებლობისა და კერძოდ, ოკუპირებული ტერიტორიების შესახებ კანონის დარღვევით განხორციელდა", _ ნათქვამია საქართველოს საგარეო საქმეთა სამინისტროს განცხადებაში.
საქართველოს საგარეო უწყების განცხადებით, რუსეთის პრემიერ-მინისტრის ვიზიტის კონტექსტი და ტონალობა ემსახურება საქართველოსაგან ე.წ. სამხრეთ ოსეთის მოჩვენებითი "დამოუკიდებლობის" არგუმენტის გამყარებას. იმდროინდელი პრეზიდენტის, მედვედევის გადაწყვეტილება ორი ქართული რეგიონის - აფხაზეთისა და ცხინვალის რეგიონის აღიარებასთან დაკავშირებით წარმოადგენდა 2008 წლის აგვისტოში საქართველოს წინააღმდეგ განხორციელებული ურცხვი სამხედრო აგრესიის პოლიტიკურად შენიღბვის განწირულ მცდელობას.
"რუსეთი ფაქტიურად იზოლირებულია ამ გადაწყვეტილებაში. მისმა ძალისხმევამ, მოესყიდა საერთაშორისო თანამეგობრობა დაშინებისა თუ წახალისების გზით მნიშვნელოვანი შედეგები ვერ გამოიღო. შესაბამისად, ბატონი მედვედევის ცხინვალში ვიზიტი რუსეთისავე შიგნით და, გარკვეულწილად, საერთაშორისო არენაზე მისი პრესტიჟის შენარჩუნებას ემსახურება.
კრემლი უნდა აცნობიერებდეს, რომ საერთაშორისო პოზიცია საქართველოს ტერიტორიულ მთლიანობასთან დაკავშირებით ურყევია, ხოლო საქართველო ვითარდება და ისეთი მომვალისკენ ისწრაფვის. მომავლისაკენ, სადაც გახლეჩილი საზოგადოების ჭრილობები შეხორცდება და რომელშიც არ იქნება საოკუპაციო ძალების ადგილი", _ ნათქვამია საქართველოს საგარეო საქმეთა სამინისტროს მიერ გავრცელებულ განცხადებაში.