პრემიერ-მინისტრი ვანო მერაბიშვილი რუსთავში მცხოვრებ შუბითიძეების ოჯახს ესტუმრა და ოჯახის წევრებს 1000 ლარიანი ვაუჩერის მოხმარების წესი თავად გააცნო, რომელიც ახალი სამთავრობო 4 წლიანი პროგრამის, ,,მეტი სარგებელი ხალხს", ფარგლებში 2013 წლის 1 იანვრიდან თითოეულ ოჯახს გადაეცემა.
ვანო მერაბიშვილის განცხადებით, მიუხედავად იმისა, რომ სახელმწიფო ზრდის პენსიას, ქმნის მოქალაქეების დასაქმების წინაპირობებს და უფრო ხელმისაწვდომს ხდის ჯანდაცვას, არავინ იცის კონკრეტული ოჯახის პრობლემები და საჭიროებები იმაზე უკეთ, ვიდრე თავად ამ ოჯახმა და ოჯახის წევრებმა.
1000 ლარიანი ვაუჩერის პროგრამა, რომელსაც მთავრობა პარლამენტს ოქტომბერში წარუდგენს, 2013 წლის 1 იანვრიდან ამოქმედდება. ვაუჩერი ძალაში იქნება ოთხი წლის განმავლობაში და ყოველ ოჯახს საშუალება ექნება წლიურად 250 ლარის ოდენობის თანხა მოიხმაროს. ოჯახები თავად გადაწყვეტენ რა გზით გამოიყენებენ აღნიშნულ ვაუჩერს - გადაიხდიან დენის, გაზის, წყლის ან სხვა კომუნალურ ხარჯებს, შეიძენენ სასკოლო სახელმძღვანელოებს ბავშვებისთვის, შეიძენენ საჭირო მედიკამენტებს, თუ მოიმარაგებენსაწვავს და სასუქს სასოფლო სამუშაოებისათვის ან დაიქირავებენ სასოფლო-სამეურნეო ტექნიკას.
