დღეს, 26 ივლისს, მელორ ვაჩნაძე #18 მსჯავრდებულთა და ბრალდებულთა სამკურნალო დაწესებულებაში გადაიყვანეს. ამის შესახებ ნათქვამია სასჯელაღსრულების, პრობაციისა და იურიდიული დახმარების სამინისტროს განცხადებაში.
სამინისტრო აცხადებს, რომ მელორ ვაჩნაძის ჯანმრთელობის მდგომარეობა სტაბილურია და სასჯელის მოხდის პერიოდში არასდროს ყოფილა კრიტიკული.
"მელორ ვაჩნაძე პატიმრობის პერიოდში არაერთხელ იქნა გადაყვანილი როგორც №18 სამკურნალო დაწესებულებაში, ისე სამოქალაქო სექტორის კლინიკაშიც. მსჯავრდებულს, წარმოდგენილი ჩივილებიდან გამომდინარე, ჩაუტარდა სრულყოფილი გამოკვლევა და დაენიშნა მკურნალობა. აღსანიშნავია, რომ პაციენტს დამატებითი გამოკვლევების ჩატარებისა და შესაბამისი მკურნალობის ტაქტიკის შერჩევის მიზნით, არაერთხელ შესთავაზეს №18 სამკურნალო დაწესებულებაში გადაყვანა. მას განემარტა, რომ აღნიშნულ დაწესებულებაში მოხდებოდა ყველა საჭირო გამოკვლევის ჩატარება და უზრუნველყოფილი იქნებოდა სეფსისის ცენტრის სპეციალისტის კონსულტაციით, რომელიც განსაზღვრავდა მკურნალობის შემდგომ ტაქტიკას და სამოქალაქო სექტორის კლინიკაში გაყვანის აუცილებლობას. მიუხედავად ზემოაღნიშნულისა, 14 მაისს პაციენტმა უარი განაცხადა №18 სამკურნალო დაწესებულებაში გადასვლაზე, ხოლო 18 მაისს გადავიდა აღნიშნულ დაწესებულებაში, მაგრამ კვლავ უარი განაცხადა შეთავაზებულ გამოკვლევებსა და სეფსისის ცენტრის სპეციალისტის კონსულტაციაზე. მიმდინარე წლის 26 ივლისს, მედპერსონალის დაჟინებული შეთავაზებების შემდეგ, პაციენტმა თანხმობა განაცხადა გამოკვლევებზე და შესაბამისად, მყისიერად გადაყვანილ იქნა №18 მსჯავრდებულთა და ბრალდებულთა სამკურნალო დაწესებულებაში, სადაც კვალიფიციური ექიმები, მათ შორის სეფსისის ცენტრის სპეციალისტი, მას ჩაუტარებენ კონსულტაციას, საჭირო გამოკვლევებს და განსაზღვრავენ შემდგომი მკურნალობის ტაქტიკას. სასჯელაღსრულების, პრობაციისა და იურიდიული დახმარების საკითხთა სამინისტროსათვის მნიშვნელოვანია, რომ ისევე, როგორც ყველა პატიმარისათვის, მათ შორის მსჯავრდებულ მელორ ვაჩნაძისთვის ხელმისაწვდომი იყოს მაღალკვალიფიციური სამედიცინო სერვისი", - აღნიშნულია განცხადებაში.
შეგახსენებთ, რომ 20 ივლისს საქართველოს სახალხო დამცველის შესახებ საქართველოს ორგანული კანონის 21-ე მუხლის "ბ" ქვეპუნქტის თანახმად, სახალხო დამცველმა სასჯელაღსრულების, პრობაციისა და იურიდიული დახმარების საკითხთა მინისტრს რეკომენდაციით მიმართა და მოუწოდა, უმოკლეს ვადებში უზრუნველყოს მსჯავრდებულ მელორ ვაჩნაძის გადაყვანა შესაბამისი პროფილის სამკურნალო დაწესებულებაში, სადაც მას ჩაუტარდება საჭირო გამოკვლევები და ადეკვატური მკურნალობა.
სახალხო დამცველის მიერ გავრცელებული ინფორმაციით, 2012 წლის 18 ივლისს პრევენციისა და მონიტორინგის დეპარტამენტის თანამშრომლებმა მოინახულეს #17 სასჯელაღსრულების დაწესებულებაში განთავსებული მსჯავრდებული მელორ ვაჩნაძე. ვაჩნაძის ჯანმრთელობის მდგომარეობა საყურადღებოა და არასათანადო მკურნალობის შემთხვევაში, შეიძლება დამძიმდეს. იგი რამდენჯერმე იქნა გადაყვანილი #18 მსჯავრდებულთა და ბრალდებულთა სამკურნალო დაწესებულებაში, სადაც ყოველ ჯერზე ჩაუტარდა სიმპტომატური მკურნალობა, თუმცა არ ჩასტარებია შესაბამისი გამოკვლევები, რომლების ჩატარების შესაძლებლობა მსჯავრდებულის თქმით, არ გააჩნია #18 მსჯავრდებულთა და ბრალდებულთა სამკურნალო დაწესებულებას. აღნიშნულიდან გამომდინარე, მისი ჯანმრთელობის მდგომარეობა არ გაუმჯობესებულა.