კახეთის გუბერნატორის ადმინისტრაციის თანამშრომლებმა ტელეკომპანია „მაესტროს" ჟურნალისტი შალვა რამიშვილი თელავის გამგეობის შენობიდან ფიზიკური ძალის გამოყენებით გააგდეს. „გადი აქედან. ხალხი არის შეწუხებული, 1 კვირაა არ ძინებია და დგეხარ და ინტრიგნობ, რას იღებ აბა. შენა ხარ უსაქმური და უსაქმურობაში ფულს იღებ", - განუცხადა შაქრო ტერტერაშვილმა, გუბერნატორის ადმინისტრაციის ზედამხედველობის სამსახურის უფროსმა შალვა რამიშვილს.
შალვა რამიშვილი თელავში გუშინ გადაცემის „აკრედიტაციის გარეშე" ჩასაწერად იმყოფებოდა. გადაცემა კახეთში მომხდარ სტიქიას და სტიქიის შედეგების სალიკვიდაციო შტაბის, ასევე, ხელისუფლების მუშაობას ეხებოდა. რამიშვილი გამგეობის შენობიდან, სადაც გუბერნატორის ადმინიასტრაციაც არის განთავსებული, მაშინ გააძევეს, როცა ის თელავის გამგეობის აპარატის უფროსს მედეა კეკელიას ესაუბრებოდა. გამგეობის შენობიდან ჟურნალისტის გაგდებაში მონაწილეობდნენ: გუბერნატორის ადმინისტრაციის ზედამხედველობის სამსახურის უფროსი შაქრო ტერტერაშვილი, ამავე სამსახურის სპეციალისტები გიორგი ქოქიაშვილი და გიორგი გიგაური, ასევე რეგიონული განვითარების სამსახურის უფროსი ლაშა ჩივიაშვილი, რომელიც კახეთის საოლქო პროკურორის გიორგი ჩივიაშვილის ძმაა.
ლაშა ჩივიაშვილმა კახეთის საინფორმაციო ცენტრის სატელეფონო ზარებს არ უპასუხა.
გიორგი ქოქიაშვილი, რომელიც გამგეობის შენობიდან შალვა რამიშვილის გაძევებაში მონაწილეობდა, გურჯაანის რაიონული პროკურატურის ყოფილი პროკურორია. პროკურატურიდან ის 2009 წელს, მას შემდეგ გაათავისუფლეს, რაც ავტოავარიის შედეგად 50 წლის ქალბატონის სიცოცხლე იმსხვერპლა. ავტოავარია საგარეჯოში მოხდა. თვითმხილველები ამბობდნენ, რომ გადაჭარბებული სიჩქარით თბილისში მიმავალი ავტომანქანა, რომელსაც ქოქიაშვილი მართავდა, შემხვედრ ავტომანქანას შეეჯახა. ავტოავარიის შედეგად ახმეტის რაიონის სოფელ ზემო ალვანში მცხოვრები 50 წლის ქალბატონი, გვარად ცისკარიშვილი ადგილზე გარდაიცვალა.