თელავში, სტიქიის შედეგების სალიკვიდაციო სამუშაოების შესრულებისას 24 წლის გიორგი გოგილაშვილი დაშავდა, რომელიც ე.წ. „სოლიდარობის ჯგუფის" წევრია და მუშად მუშაობდა. ახალგაზრდას ხე დაეცა. იგი გურჯაანის სამედიცინო ცენტრშია მოთავსებული. ექიმების თქმით, მისი ჯანმრთელობის მდგომარეობა სტაბილურია.
„დაშავებული მამაკაცი საავადმყოფოში გუშინ შემოიყვანეს. ის სოფელ ჩალაუბნის მაცხოვრებელია. მას საჯდომი ძვალი აქვს გატეხილი. პაციენტს გამოკვლევები ჩაუტარდა და სხვა რაიმე სახის დაზიანებები არ აღენიშნება. მისი ჯანმრთელობის მდგომარეობა მძიმე არ არის და ოპერაცია არ ესაჭიროება. პაციენტი მკურნალობის კურსს ჩვენს საავადმყოფოში გადის", - განუცხადა კახეთის საინფორმაციო ცენტრს გურჯაანის სამედიცინო ცენტრის ექიმმა გიორგი ბერიაშვილმა.
შეგახსენებთ, რომ გუშინ, გურჯაანის რაიონის სოფელ კალაურში სტიქიით დაზიანებული სახლების აღდგენაზე დასაქმებული მუშა, 71 წლის ნოდარ კორშია სახურავიდან გადმოვარდა და დაშავდა. მამაკაცი გურჯაანის სამედიცინო ცენტრიდან უკვე სახლში გაწერეს.
ექიმების თქმით მისი ჯანმრთელობის მდგომარეობა სტაბილურია.
მასალის გამოყენების პირობები