ილია სიმონია ივანკოვის მკვლელობის შემდეგ ეჭვმიტანილთა წრეში პირველივე დღეებში მოხვდა. საქმე ისაა, რომ "მახოსა" და "იაპონჩიკს" შორის ჯერ კიდევ 1980-იან წლებში ისკუტსკის ოლქის ქალაქ ტულუნის კოლონიაში უთანხმოება მოხდა. ამ დავის შედეგად, ერთმანეთს ივანკოვის ორი უახლოესი პირი - ასლან უსოიანი (დედ ჰასანი) და ტარიელ ონიანი (ტარო) დაუპირისპირდნენ. 2010 წელს "მახო" დაკავების შემდეგ ივანკოვის მკვლელობაზე დაიკითხა, თუმცა სამართალდამცავებმა მისგან ვერავითარი ინფორმაცია ვერ მიიღეს. იგი ე.წ. ქურდული ტრადიციის მიხედვით გამოძიებასთან არ თანამშრომლობდა. სწორედ მაშინ სცადეს მისთვის ნერწყვისა და ოფლის ანალიზი აეღოთ და ეს ნიმუშები ივანკოვის მკვლელობის ადგილზე ნაპოვნი ნიმუშებისთვის შეედარებინათ, თუმცა "მახომ" ამაზე უარი განაცხადა.
"იაპონჩიკის მკვლეობაში "ქურდულმა სამყარომ" ეჭვი იმთავითვე ტარიელ ონიანზე მიიტანა. ივანკოვის გარდაცვალების შემდეგ გამართულ ქურდულ შეკრებაზე ონიანს სასიკვდილო განაჩენი გამოუტანეს და იზოლატორ "მატროსსკაია ტიშინაში", სადავ მაშინ ონიანი იმყოფებოდა, წერილი შეგზავნეს, რომელშიც ყველას აცნობებდნენ, რომ ონიანს უნდა გასწორებოდნენ. ეს წერილი ხელში ადმინისტრაციას ჩაუვარდა", _ წერს რუსული მედია გამოძიებასთან დაახლოებულ წყაროზე დაყრდნობით.

მათი ინფორმაციით, არსებობს ორი ვერსია: ან სიმონიას ბრალს ივანკოვის მკვლელობაში წაუყენებენ, ან იგი მოწმის სტატუსით დაიკითხება. სიმონიაზე ეჭვის მიტანის კი მრავალი საფუძველი არსებობს. გამოძიების ინფორმაციით, სწორედ ივანკოვის ჩარევის შემდეგ დაკარგა "მახომ" "კანონიერი ქურდის" სტატუსი, მეორე არის ის, რომ თავისი პირველი სასჯელი სიმონიამ დაქირავებული მკვლელობის შესრულებისთვის მოიხადა და კიდვე იმის გამო, რომ სიმონია თავის დროზე კომკავშირის წევრი იყო და სწორედ "იაპონჩიკმა" ამხილა იგი და ბოლოს, სიმონია 2010 წლის სექტემბერში სწორედ იმ რაიონში დააკავეს, სადაც ივანკოვზე თავდასხმა მოხდა.

შეგახსენებთ, რომ 2009 წლის 28 ივლისს ქილერმა "იაპონჩიკს" სნაიპერის იარაღიდან ესროლა, მაშინ, როდესაც ის რესტორან "ტაისკი სლონიდან" გამოდიოდა.