საქპატენტის თავმჯდომარე ირაკლი ღვალაძე ჩინეთში გაემგზავრა, სადაც 20-26 მაისს აუდიოვიზუალური ნაწარმოების დაცვის თემაზე დიპლომატიური კონფერენცია გაიმართება. კონფერენციას დაესწრებიან ინტელექტუალური საკუთრების მსოფლიო ორგანიზაციის (ისმო) წევრი სახელმწიფოების მაღალი რანგის თანამდებობის პირები, მთავრობათაშორისი და არასამთავრობო ორგანიზაციების წარმომადგენლები. კონფერენციის მიზანია „აუდივიზუალური ნაწარმოების დაცვის შესახებ" საერთაშორისო შეთანხმების საბოლოო ტექსტის შემუშავება და მიღება. ისმო-ს განმარტებით აღნიშნული შეთანხმება დამატებით სამართლებრივი დაცვის მექანიზმებს შექმნის აუდიოვიზუალურ ნაწარმოებებზე უფლებების მფლობელთათვის, მათ შორის კინოსა და ტელევიზიაში მოღვაწე მსახიობებისთვის.
ჩინეთში ვიზიტის ფარგლებში საქპატენტის თავმჯდომარე შეხვედრას გამართავს ჩინეთის რესპუბლიკის სასაქონლო ნიშნების უწყების ხელმძღვანელთან. შეხვედრაზე განიხილება ქართული გეოგრაფიული აღნიშვნებისა და ადგილწარმოშობის დასახელებების ჩინეთის რესპუბლიკის ტერიტორიაზე რეგისტრაციისა და დაცვის საკითხები. შეხვედრაზე განიხილება ასევე ორი ქვეყნის უწყებებს შორის ურთიერთთანამშრომლობის გაღრმავების საკითხები.