სეპარატისტულ აფხაზეთში ხუთდღიანი ვიზიტით საქართველოში ჩეხეთის რესპუბლიკის საელჩოს დელეგაცია ჩავიდა. ინფორმაციას ამის შესახებ აფხაზური მედია ავრცელებს. მათი ინფორმაციით, ჩეხეთის საელჩოს დელეგაცია სეპარატისტული აფხაზეთის ე.წ. საგარეო საქმეთა მინისტრს ვიაჩესლავ ჩირიკბას და მის ე.წ. მოადგილეებს შეხვდა.
"აფხაზეთი - ევროპის ნაწილია. ჩვენ ვემხრობით იმას, რომ ჩვენზე რაც შეიძლება მეტი იცოდნენ. თქვენ გაქვთ საშუალება, თქვენი თვალით ნახოთ, რომ რესპუბლიკა დინამიკური, თანამედროვე ცხოვრებით ცხოვრობს", _ განაცხადა ჩირიკბამ შეხვედრაზე.
აფხაზური მხარე აღნიშნული ინფორმაციის გავრცელებისას აღნიშნავს, რომ ეს ჩეხეთის ელჩის პირველი ვიზიტია აფხაზეთში. აფხაზური მედია ასევე იუწყება, რომ შეხვედრაზე საუბარი ასევე შეეხო ინციდენტების პრევენციისა და მათზე რეაგირების სამუშაო ჯგუფების გალის შეხვედრებს, რომლებიც ამჟამად არ მიმდინარეობს.
"გვინდა ყველა მხარეს მოვუწოდოთ, რომ შეხვედრები გააგრძელონ. ეს ის ფორმატია, რომლის მხარდაჭერა ახლა გვინდა. ჩეხეთი ევროკავშირის წევრია და ჩვენი დიპლომატები აქტიურად მონაწილეობენ სამხრეთ კავკასიასთან დაკავშირებული საკითხების განხილვაში. ჩვენ ასევე დიდ მნიშვნელობას ვანიჭებთ ჟენევის საერთაშორისო მოლაპარაკებებს", _ განაცხადა ჩეხეთის ელჩმა ივან ესტრაბამ და აღნიშნა, რომ ჩეხეთმა მრავალ ხალხებს შორის უთანხმოებები გადაიტანა.
"როგორც მოგეხსენებათ, ჩეხოსლოვაკია უკვე აღარ არსებობს, არის ორი სახელმწიფო, რომლებმაც დროთა განმავლობაში ჰარმონიულად ცხოვრება ისწავლეს. იმედი მაქვს, რომ თქვენი ურთიერთობებიც ასეთ დონეს მიაღწევს, მაშინ როდესაც ისტორიული უთანხმოებები შორეულ წარსულად გაგახსენდებათ", _ განაცხადა ჩეხმა დიპლომატმა.
