დონორთა საერთაშორისო დღის აღსანიშნავად ფარმაცევტულმა კომპანია "ავერსმა" საქველმოქმედო აქცია გამართა დევიზით "გისურვებთ ჯანმრთელობასა და სულიერ სიმშვიდეს!"
ქვეყნის თითოეული მოქალაქის ჯანმრთელობა "ავერსის" მთავარი საზრუნავია. სწორედ ეს უდევს საფუძვლად კომპანიის უამრავ სასიკეთო წამოწყებას და დონორთა საერთაშორისო დღისადმი მიძღვნილი პროექტიც სწორედ ამის დასტური გახლდათ.
აქციის ფარგლებში, "ავერსის" ასზე მეტმა თანამშრომელმა "ავერსის კლინიკაში" სრულიად უსასყიდლოდ გაიღო სისხლი.
დონორთა საერთაშორისო დღის აღნიშვნის ინიციატორად სამი საერთაშორისო ორგანიზაცია გვევლინება. ესენი გახლავთ: "წითელი ჯვრის საერთაშორისო ფედერაცია", "სისხლის გადასხმის საერთაშორისო საზოგადოება" და "სისხლის დონორთა საერთაშორისო ორგანიზაცია". სტატისტიკური მონაცემების თანახმად, მსოფლიოში ყოველ მესამე ადამიანს სიცოცხლეში ერთხელ მაინც ესაჭიროება სისხლის გადასხმა. დონორთა სისხლი აუცილებელია დამწვრობისა და ტრავმების, მძიმე ოპერაციებისა თუ მშობიარობის შემთხვევაში, ასევე დონორთა სისხლი უხანგრძლივებს სიცოცხლეს ჰემოფილიითა და ანემიით დაავადებულ ადამიანებს. სისხლი ესაჭიროებათ ონკოლოგიურ პაციენტებსაც, ასე რომ ყოველი ჯანმრთელი ადამიანის მიერ გაღებული სისხლი ასობით ავადმყოფს უმსუბუქებს ცხოვრებას.
ავერსის აქცია კიდევ ერთი დასტური გახლდათ იმისა, რომ კომპანიის ხელმძღვანელობა და ყოველი თანამშრომელი თანადგომას უცხადებს პაციენტებს, რომლებსაც საზოგადოების მხარდაჭერა სჭირდებათ. "ავერსი" ხომ თითოეული მოქალაქის ჯანმრთელობასა და სულიერ სიმშვიდეზე ზრუნავს.