საქართველო ეტაპობრივად აგრძელებს ჩრდილოატლანტიკურ ორგანიზაციაში გაწევრიანებას და გადაწყვეტილებას ხელს ვერავინ ვერ შეუშლის, _ აღნიშნულის შესახებ საქართველოს საგარეო საქმეთა მინისტრმა გრიგოლ ვაშაძემ ნატოს გენერალური მდივნის სპეციალური წარმოადგენლის სამხრეთ კავკასიის საკითხებში ჯეიმს აპატურაისთან შეხვედრის დასრულების შემდეგ განაცხადა.
"ჩვენი მადლიერების გრძნობა გამოვხატეთ, რადგან ჩიკაგოს სამიტი კიდევ ერთი წინგადადგმული ნაბიჯი იყო. ჩიკაგოს სამიტზე ჩვენ მივაღწიეთ რამდენიმე მნიშვნელოვან შედეგს. საქართველო ერთადერთი ქვეყანა იყო, რომელიც მოლაპარაკების ყველა ფორმატში მონაწილეობდა. ფინალურ დოკუმენტს რაც შეეხება, ყველაფერი, რაც ჩვენ გვაინტერესებდა და გვჭირდებოდა, ამ დოკუმენტში შევიდა. დოკუმენტში ხაზგასმულია ის წვლილი, რაც ჩვენ შეგვაქვს ევროატლანტიკურ უსაფრთხოებაში",_ განაცხადა ჟურნალისტებთან ვაშაძემ და აღნიშნა, რომ საქართველო აგრძელებს სვლას ალიანსში გასაწევრიანებლად.
"ჩვენ წყნარად, მშვიდად, ნაბიჯ-ნაბიჯ გავაგრძელებთ ალიანსთან მუშაობას, რადგან ალიანსი რჩება საქართველოს საგარეო პოლიტიკის ერთ-ერთ მთავარ პრიორიტეტად და ვერასოდეს ვერაფერი ვერ შეცვლის საქართველოს მოქალაქეების, ჩვენი საზოგადოების, სახელმწიფოს გადაწყვეტილებას, გახდეს ალიანსის სრულუფლებიანი წევრი",_ განცხადა ვაშაძემ.
შეგახსენებთ: ჯეიმს აპატურაი საქართველოში ნატოს კვირეულის ფარგლებში იმყოფება.
