შრომის, ჯანმრთელობისა და სოციალური დაცვის მინისტრმა ზურაბ ჭიაბერაშვილმა "ავერსის" კლინიკაში კიდურების შემანარჩუნებელი ცენტრი გახსნა. მინისტრი დეტალურად გაეცნო კლინიკის საქმიანობას და მედპერსონალს შეხვდა.
ცენტრის მიზანია, კიდურების ამპუტაციის თავიდან აცილება, პრობლემის დროული გამოვლენისა და მკურნალობის გზით. თანამედროვე მიღწევების მიუხედავად, კიდურების ამპუტაცია დღემდე სამედიცინო სფეროს მთავარი გამოწვევაა. ამის მიზეზი, ძირითადად, სისხლძარღვოვანი, ონკოლოგიური და ორთოპედიული დაავადებები ხდება. კლინიკა მაღალკვალიფიციური კადრებით დაკომპლექტდა. ქირურგიული და თერაპიული პროფილის ექიმების კოორდინირებული მუშაობა ამპუტაციების რიცხვს მნიშვნელოვნად შეამცირებს.
მოსახლეობის ჯანმრთელობის მდგომარეობის გაუმჯობესება მიმდინარე რეფორმის ერთ-ერთი პრიორიტეტია. მინისტრის განცხადებით, მისასალმებელია ნებისმიერი ინოვაციური პროექტი, რომელიც საქართველოში სამედიცინო სფეროს განვითარებას ემსახურება.
ღონისძიების ფარგლებში, ჯანდაცვის მინისტრი კიდურების შემანარჩუნებელი უნიკალური ოპერაციების ამსახველი ფილმის ჩვენებასაც დაესწრო.
