„რუსთავის ავტობაზრობის" მრავალფეროვან ინფრასტრუქტურას უმაღლესი კლასის სასტუმრო და რესტორანი „უკრაინკა" შეემატება. კვირას, 27 მაისს, 14:00 საათზე სასტუმრო ოფიციალურად გაიხსნება, რის შემდეგაც ავტობაზრობაზე მეზობელი ქვეყნებიდან ჩამოსულ სტუმრებს ევროპული დონის კომფორტით უკვე 24 საათიან რეჟიმში უმასპინძლებენ.
ავტობაზრობის მენეჯმენტის ცნობით, „პრივატბანკმა" ბოლო პერიოდში ავტობაზრობის ინფრასტრუქტურის გაუმჯობესებაში 25 მილიონი დოლარი დააბანდა, სულ კი განხორციელებული ინვესტიცია 40 მილიონ დოლარს შეადგენს.
ახალ სასტუმროში 63 ნომერია, პირველ სართულზე კი განთავსებულია უკრაინული რესტორანი და სწრაფი კვების ობიექტი, სადაც სტუმრებს, როგორც უკრაინული, ისე ქართული და ევროპული კერძების დაგემოვნება შეეძლებათ.
„სასტუმროში, რომელიც ყველა სტანდარტის გათვალისწინებით აშენდა, გვაქვს „ლუქსი", „პოლულუქსი" და „სტანდარტ" ნომრები. ყველა ნომერი განსხვავებულია დიზაინითა და ფერთა გამით. ნომრები აღჭურვილია კომფორტული საწოლებით, სავარძლებით, ჟურნალის მაგიდით, პლაზმური ტელევიზორით, ტელეფონით, კონდიციონერით, მაცივარით. ამდენად, ჩვენს სტუმრებს შეუძლიათ დაისვენონ და იმუშაონ მშვიდ გარემოში. გვაქვს მწეველების და არამწეველებისათვის განკუთვნილი ოთახები. სასტუმროს პირველ სართულზე კი რესტორანი „უკრაინკა" არის განთავსებული, სადაც სტუმრებს უკრაინულ ნაციონალურ სამოსში ჩაცმული პერსონალი მოემსახურება. ვინაიდან ჩვენი სტუმრების საკმაოდ დიდ ნაწილს სხვა ქვეყნიდან ჩამოსული ადამიანები წარმოადგენენ, გვსურდა მათთვის ჩვენთან სტუმრობა მაქსიმალურად კომფორტული სასიამოვნო გაგვეხადა. ახლა ჩვენ უკვე გვაქვს საშუალება მათ, დასვენება და მუშაობა აქვე ავტობაზრობის ტერიტორიაზე ახლადგახსნილ სასტუმროში შევთავაზოთ"-აცხადებს ავტობაზრობის გენერალური დირექტორი ევგენი უსტინოვი.
ამასთანევე, რუსთავის ავტობაზრობამ, კლიენტებისათვის მეტი კომფორტის შექმნისა და მათი ხარჯების დაზოგვის მიზნით, სპეციალური ეკონომიური პაკეტი შექმნა, რომლის ფარგლებშიც სტუმარს ნომრის დაქირავება ნახევარი დღითაც შეეძლება.
„ჩვენ საგანგებოდ შევქმენით პაკეტი „ნახევარი დღე". ეს სერვისი განსაკუთრებით მათთვის იქნება სახარბიელო, ვინც საქართველოში მოკლე ხნითაა ჩამოსული, სურს გამგზავრებამდე დარჩენილი დრო, მშვიდ კომფორტულ გარემოში გაატარის და ნაკლები გადახადოს. ჩვენ მუდმივად ვხვეწავთ არა მარტო ჩვენს ინფრასტრუქტურას, არამედ ჩვენს მომსახურებებსაც. სწორედ ეს განაპირობებს იმას, რომ ჩვენი მომხმარებელი მუდამ კმაყოფილია,"- აცხადებს ევგენი უსტინოვი.
რუსთავის ავტობაზრობა 2009 წლიდან საავტომობილო ვაჭრობის სფეროში, მთელი ამეირკავკასიის რეგიონში უპირობო ლიდერად რჩება. იგი 22 ჰექტარ ტერიტორიაზეა განთავსებული და გააჩნია უმაღლესი სტანდარტებით დაგებული ბეტონის სექციები, სადაც გასაყიდი ავტომობილები კლასიფიცირებულადაა განთავსებული. რუსთავის ავტობაზრობას გააჩნია რესურსი უზრუნველყოს ერთდროულად ხუთიათასზე მეტი ავტომანქანის დგომა. ბაზრობის ტერიტორიაზე ფუნქციონირებს 10 მაღალი კლასის ავტოგასამართი ბოქსი, სადაც მომხმარებელს საშუალება აქვს ადგილზე შეამოწმოს და შეაკეთოს ავტომანქანა. რუსთავის ავტობაზრობის მომსახურებით სარგებლობენ არა მარტო საქართველოს და მისი მეზობელი ქვეყნების მოქალქეები, არამედ მომხმარებლები მთელი დსთ-ს ქვეყნებიდან. სავაჭრო დღეებში რუსთავის ავტობაზრობაზე მომხმარებლის ტრაფიკი 25 ათასს უტოლდება.