2010 წელს მსოფლიო ეკონომიკის ზრდა 0,2 პროცენტით მაღალი იქნება ვიდრე ეს ადრე ივარაუდებოდა და 3,1 პროცენტით განისაზღვრება. ხოლო მსოფლიო ეკონომიკის მოთხოვნილება ნედლ ნავთობზე, რომელიც გასულ წელს შემცირდა 1,38 მლნ ბარელით დღეში, საშუალოდ გაიზრდება 0,82 მლნ ბარელით დღეში და მიაღწევს 85,15 მლნ ბარელს/დღეში. ამის შესახებ ნათქვამია ოპეკის ყოველთვიურ მოხსენებაში მსოფლიო სანავთობო ბაზარზე ვითარების შესახებ.
ოპეკის ექსპერტთა აზრით, 2010 წელს ეკონომიკური ზრდა აშშ-ში მიაღწევს 1,9 პროცენტს, იაპონიაში - 1,1 პროცენტს, ხოლო ევრო ზონის ქვეყნებში - 0,6 პროცენტს.
ოპეკის მოხსენების თანახმად, ნავთობის მოპოვება იმ ქვეყნებში, რომლებიც არ შედიან ოპეკში, მიმდინარე წელს გაიზრდება 0,35 მლნ ბარელით/დღეში 51,31 მლნ ბარელამდე დღეში. ამასთან, ძირითადი ზრდა მოხდება რუსეთსა და აშშ-ში ნავთობის წარმოების ზრდის შედეგად.
გასულ წელს ოპეკის ნავთობზე მოთხოვნილებამ შეადგინა 28,7 მლნ ბარელი/დღეში, რაც 2,3 მლნ ბარელით/დღეში ნაკლებია 2008 წლის მაჩვენებელთან შედარებით. როგორც ივარაუდება, მიმდინარე წელს ეს ციფრი არ გადააჭარბებს 28,6 მლნ ბარელს/დღეში. დეკემბრის თვეში ოპეკის წევრმა ქვეყნებმა განახორციელეს დღეში 29,14 მლნ ბარელი ნედლი ნავთობის წარმოება და მიწოდება მსოფლიო ბაზარზე ერაყის ჩათვლით, რომელზეც არ ვრცელდება ოპეკის ნავთობის მოპოვების კვოტები, ხოლო ერაყის გამოკლებით - 26,68 მლნ ბარელი/დღეში.
