თბილისის ბიუჯეტიდან მცირე და საშუალო ბიზნესის დასაფინანსებლად იაფი კრედიტის გამოყოფისათვის 1 მილიონი ლარია გათვალისწინებული. ამის შესახებ დღეს საკრებულოს სხდომაზე თბილისის ვიცე-მერმა მამუკა ახვლედიანმა განაცხადა.
იაფი ფინანსური რესურსების ხელმისაწვდომობის უზრუნველყოფის პირობები დღეს საკრებულომ დაამტკიცა.
"დაფინანსდება ის პროექტები, რომლებიც ხელს შეუწყობენ ძველი და ახალი თბილისის შემოერთებული ტერიტორიის განვითარებას. ახალი სამუშაო ადგილების შექმნას, ტექნოლოგიური სიახლეების დანერგვას, ტურიზმისა და წარმოების განვითარებას, ასევე საქართველოს რეგიონებში წარმოებული ეკოლოგიურად სუფთა პროდუქციის თბილისელი მომხმარებლისათვის მიწოდებას", _ განაცხადა მამუკა ახვლედიანმა.
ახვლედიანის განცხადებით, კერძო პირსა და ბანკს შორის გარანტი თბილისის მერია იქნება. პარტნიორ ბანკს შესაძლებლობა ექნება გასცეს სესხი წლიური 10%-იანი განაკვეთით. სესხის გაცემის პერიოდი მაქსიმუმ 60 თვეს მოიცავს.
