სოფლის მეურნეობის მინისტრმა ზაზა გოროზიამ ნადარბაზევის წყალსაცავი მოინახულა, რომელიც 1990 წლიდან არ ფუნქციონირებდა. წყალსაცავზე სათავე ნაგებობის სარეაბილიტაციო სამუშაოების დასრულების შემდეგ ხურვალეთის სარწყავი სისტემა სრული დატვირთვით ამოქმედდა და დაახლოებით 3 ათას ჰექტარზე მეტი მიწის ფართობის მორწყვას უზრუნველყოფს.
დღესვე, მინისტრმა სოფელ ხურვალეთში ბოსტნეული კულტურების სადემონსტრაციო ნაკვეთი დაათვალიერა და არსებულ მდგომარეობას გაეცნო. 65 ჰექტარზე გაშენებული სადემონსრაციო ნაკვეთები ხურვალეთში ჩასახლებულ დევნილთა საკუთრებაა.
,,სოფლის მეურნეობის სამინისტროს მხარდაჭერით, სოფელ ხურვალეთში მცხოვრები მოსახლეობა მცენარეთა ახალი ჯიშების, წარმოების ტექნოლოგიების, ფერმერთა მეურნეობის მართვის, მცენარეთა დაცვისა და ნიადაგის გამდიდრების შესახებ კონსულტაციებს გამოცდილი და კვალიფიციური ექსპერტებისაგან იღებს. მსგავსი ტიპის მეურნეობები ყველა იმ ტეროროტიაზე გაშენდება, სადაც იძულებით გადაადგილებულ პირთა კომპაქტური ჩასახლებებია", - აღნიშნა მინისტრმა.
ხურვალეთის სადემონსტრაციო ნაკვეთებზე პომიდვრის, ხახვის, კომბოსტოს, კიტრის, ტკბილი წიწაკისა და ჭარხლის ქართული წარმოების ჩითილები უახლესი ტექნოლოგიის გამოყენებით ირგვება. მიწის ფართობის მორწყვა თანამედროვე წვეთოვანი სისტემით ხორციელდება, რომელსაც წყალი რეაბილიტირებული ნადარბაზევის წყალსაცავიდან მიეწოდება. თანამედროვე სისტემის მეშვეობით წყალი ჯერ იფილტრება, შემდეგ სასუქებითა და აგროქიმიკატებით გამდიდრებული მცენარეებს მიეწოდება. ხურვალეთის მეურნეობაში 150 ადგილობრივია დასაქმებული.