საშემოსავლო გადასახადის შემცირების შემდეგ, ფიზიკური პირი თანხას ნებყოფილებით დაზოგავს და აქტივების მართვის კომპანიაში განათავსებს. ამის შესახებ „საგადასახადო კოდექსში" ცვლილებების და „ნებაყოფლობით ინდივიდუალური დაზოგვის შესახებ" მთავრობის საკანონმდებლო პაკეტი პარლამენტში უკვე ინიცირებულია.
კერძოდ, კანონპროექტის თანახმად, მას შემდეგ, რაც 2013 წლიდან საშემოვლო გადასახადი 20-დან 18 პროცენტამდე შემცირდება, ფიზიკურ პირს საშემოსავლო გადასახადის შემცირების შედეგად გამოთავისუფლებული ხელფასის 2 პროცენტის ახლებურად განკარგვის საშუალება ექნება.
როგორც მთავრობის საპარლამენტო მდივანი გია ხუროშვილი ჟურნალისტებთან განმარტავს, სურვილის შემთხვევაში, ფიზიკური პირი თანხას აქტივების მართვის კომპანიაში განათავსებს, ფონდში თანხის შეტანას კი ნებისმიერი დასაქმებული შეძლებს.
"2013 წლიდან ფიზიკურ პირს საშუალება ექნება, საშემოსავლო გადასახადიდან 2 % მომგებიან, ეკონომიკურ პროექტებში განათავსოს. 2014 წლიდან კი 2 % გარანტირებული იქნება, თუმცა ამავე დროს თუ ფიზიკური პირი დამატებით 3 %-ის დაზოგვას გადაწყვეტს, სახელმწიფო მას კიდევ 3 %-ს ჩაურიცხავს. შესაბამისად, ჯამში 2014 წლიდან დაზოგვის ფონდში ხელფასის 8 %-ის ოდენობის თანხა განთავსდება," - განმარტა ხუროშვილმა.
რაც შეეხება აქტივების მართვის კომპანიებს, რომელიც ფიზიკური პირების შენატანების მართვას უზრუნველყოფს, მისი ლიცენზირების პირობებს, ეროვნული ბანკისა და ფინანსთა სამინისტროს ერთობლივი ბრძანება დაადგენს.
ხუროშვილი მიიჩნევს, რომ ეროვნული ბანკის მიერ გატარებული რეფორმებისა და მათი ეფექტიანი მონიტორინგის შედეგად, საბანკო სექტორი საკმაოდ მდგრადი და მყარია, შესაბამისად, აღნიშნული კომპანიების მონიტორინგი ეროვნულმა ბანკმა უნდა განახორციელოს.
მთავრობის საპარლამენტო მდივნის განცხადებით, ადამიანებს ფონდების მიერ შემოთავაზებული ეკონომიკური სქემების წინასწარ გაცნობის საშუალება ექნებათ, რითაც მათთვის მომგებიანი პირობების შერჩევას შეძლებენ. ხუროშვილის მტკიცებით, კონკრეტულ ადამიანს საშუალება ექნება, ყოველდღიურ რეჟიმში, ინტერნეტის მეშვეობით ნახოს, როგორ ხორციელდება ესა თუ ის პროექტი და რა მოგება შეიძლება მოუტანოს მის დივიდენდს.
,,ინიციატივის მიზანი დამატებითი სოციალური დაცვის გარანტიის შექმნაა. ფიზიკური პირები გარკვეული ვადის გასვლის შემდეგ, დაგროვილი თანხის გამოყენებას შეძლებენ. თანხის გატანის ვადის შესახებ ჯერ კიდევ მსჯელობა მიმდინარეობს. თუმცა, გადაუდებელი საჭიროების შემთხვევაში გამონაკლისი დაიშვება და პირს თანხის ვადაზე ადრე გამოტანის საშუალება ექნება. ზოგადად, საშემოსავლო გადასახადს კომპანია იხდის და არა თანამშრომელი, რაც კომპანიის სახელფასო ხარჯია", - აღნიშნა ხუროშვილმა და დასძინა, რომ ინიციატივის მიზანია საშემოსავლო გადასახადის შემცირებით გამოთავისუფლებული თანხა უშუალოდ დასაქმებულს მოხმარდეს.
