დღეს პროფკავშირების სასახლეში, პოლიტიკური პარტია ,,განახლებული საქართველოსთვის" თბილისის ორგანიზაციის ინიციატივითა და ხელშეწყობით, გაიმართა შეხვედრა აფხაზეთიდან და სამაჩაბლოდან დევნილ მოსახლეობასთან. შეხვედრაში მონაწილეობდა 1000-ზე მეტი სხვადასხვა თაობის დევნილი, როგორც აფხაზეთიდან, ასევე ცხინვალის რეგიონიდან.
როგორც "ჯი-ეიჩ-ენს" პარტიიდან აცნობეს, სკაიპ-კონფერენციის რეჟიმში დევნილებს მიმართა რუსეთში მოღვაწე ცნობილმა ბიზნესმენმა, წარმოშობით სოხუმელმა მინდია გულუამ. მან თანამემამულეებს მოუწოდა მხარდაჭერისა და თანადგომისკენ მიმდინარე წლის 12 მაისს, 15:00 საათზე, საქართველოს სხვადასხვა დიდ ქალაქში (თბილისი, ზუგდიდი, ბათუმი, ხობი, ჩხოროწყუ), აფხაზეთიდან და სამაჩაბლოდან დევნილთა ფართომასშტაბიან შეკრებასთან დაკავშირებით. როგორც ცნობილია, დევნილთა ინიციატივით, მიმდინარე წლის 12 მაისი გამოცხადდება ქართველთა, აფხაზთა და ოსთა ერთობის დღედ, რომელიც სათავეს დაუდებს დევნილთა დაბრუნების პროცესს მშობლიურ აფხაზეთსა და სამაჩაბლოში. შეხვედრაზე ასევე ისაუბრეს 12 მაისს დევნილთა საკოორდინაციო საბჭოს არჩევაზე და დევნილთა საერთაშორისო საქველმოქმედო ფონდის დაარსებაზე, რომლის ინიციატივაც ბიზნესმენ მინდია გულუას ეკუთვნის. ფონდის დაფუძნებაში მონაწილეობას მიიღებენ სხვა დევნილი ბიზნესმენებიც. ფონდის სათაო ოფისი განთავსდება შვეიცარიაში და იგი იმუშავებს სოციალური და ეკონომიკური პროექტების განხორციელების კუთხით დევნილთა მდგომარეობის გაუმჯობესებისათვის.
მინდია გულუამ ამომწურავად უპასუხა დარბაზში მყოფ დევნილთა შეკითხვებს. საუბარი შეეხო როგორც აფხაზეთსა და ცხინვალში დაბრუნების დაჩქარებას, ასევე სხვა მიმდინარე პრობლემებსაც. მან თანამემამულეებს მოუწოდა ერთსულოვნებისა და თანადგომოსკენ. დევნილებს სიტყვით მიმართეს პოლიტიკური პარტიის თავმჯდომარემ ნანა გულუამ და თბილისის ორგანიზაციის ხელმძღვანელმა გიორგი ოძელმა.
შეხვედრაზე ხაზი გაესვა იმასაც, რომ ხვალ, 5 მაისს, 12:00 საათზე, ქ.ზუგდიდში, დაგეგმილია შეხვედრა სამეგრელოში მცხოვრებ დევნილებთან, რომელსაც გაუძღვება პოლიტიკური პარტია ,,განახლებული საქართველოსთვის" რეგიონალური სამსახურის უფროსი ლაშა გვასალია. შეხვედრაზე დევნილებს მიმართავს პარტიის მრჩეველი საერთაშორისო საკითხებში მინდია გულუა, რომელიც მოსკოვიდან ჩაერთვება სკაიპ-კონფერენციის რეჟიმში. საუბრის მთავარი თემა იქნება 12 მაისს - აფხაზეთიდან და სამაჩაბლოდან დევნილთა შეკრების საკითხი და სამეგრელოში არსებული ვითარების ანალიზი.