ნავთობპროდუქტების იმპორტიორთა კავშირის განცხადებით, ბოლო პერიოდის განმავლობაში საერთაშორისო სასაქონლო ბაზრებზე ნავთობის ფასი კლებულობს. კერძოდ, 2012 წლის 3 მაისის ვაჭრობის შედეგებით ლონდონში InterContinental Exchange Futures Europe-ზე (IСE Futures Europe) - Brent ტიპის ნავთობის ფასმა შეადგინა 116,08 დოლარი/ბარელზე, ხოლო ნიუ-იორკში York Mercantile Exchange-ზე (NYMEX) - Light Sweet ტიპის ნავთობის ფასმა - 102,54 დოლარი / ბარელზე.
კავშირში აცხადებენ, რომ მიუხედავად იმისა, რომ კვლავინდებურად დაძაბული ვითარებაა ირანის გარშემო, ბოლო რამოდენიმე კვირის განმავლობაში ნავთობის ფასი მცირდება .
"ნავთობის მსოფლიო ფასის კლება განპირობებულია შემდეგი გარემოებებით:
პირველ რიგში აშშ-ში ნავთობის მარაგები, რომელიც ბოლო რამოდენიმე კვირის განმავლობაში მუდმივად იზრდება და დღეისათვის ყველაზე მაღალ მაჩვენებელზეა 1990 წლის შემდეგ. იქიდან გამომდინარე, რომ აშშ ნავთობის უდიდესი მომხმარებელია მსოფლიოში (მოიხმარს მსოფლიო ნავთობის მეხუთედს), ეს სტატისტიკური ინფორმაცია ყოველთვის გავლენას ახდენს ნავთობის მსოფლიო ფასზე.
ასევე უნდა აღინიშნოს, რომ პარალელურად ამისა ბოლო პერიოდში საერთაშორისო სავალუტო ბაზრებზე საკმაო სტაბილურობით ხასიათდება აშშ დოლარი, რომელიც გამყარებულია მსოფლიოს ექვსი წამყვანი ვალუტის მიმართ. ეს ფაქტორი გამორიცხავს სანავთობო ბაზრებზე სპეკულაციურ გარიგებებს და ასევე ყოველთვის მოქმედებს ნავთობის ფასზე", - აცხადებენ ნავთობპროდუქტების იმპორტიორთა კავშირი.
რაც შეეხება საერთაშორისო ფასებს ნავთობპროდუქტებზე Platt's-ის მიხედვით, რომელზეც დამოკიდებულია საქართველოს საცალო ქსელში არსებული ვითარება, ბოლო პერიოდში ის ნავთობის ფასების პარალელურად მცირდება. თუმცა აქვე უნდა აღინიშნოს, რომ მიმდინარე წლის დასაწყისთან შედარებით Platt's-ის ფასები გაზრდილია: ბენზინის შემთხვევაში 15-16 პროცენტით 922,50 დოლარიდან 1081,00 დოლარამდე/ტონაზე, ხოლო დიზელის საწვავზე - 10-11 პროცენტით 910,50 დოლარიდან 1007,75 დოლარამდე/ტონაზე.
რაც შეეხება საქართველოს საცალო ქსელს, მიმდინარე წელს ფასების კორექტირება დაფიქსირდა 4-ჯერ 5-5 თეთრით/ლიტრაზე, ჯამში 20 თეთრით, ანუ 10 პროცენტით. შესაბამისად, ფასების კორექტირება საცალო ქსელში დამოკიდებული იქნება Platt's-ის ფასების შემცირების შემდგომ ტენდენციებზე.