სადაზღვევო კომპანიები "ალდაგი ბისიაი" და "იმედი ელი" გაერთიანდნენ. გარიგების შედეგად "ალდაგი ბისიაი" "იმედი ელის" აქციათა 85 %-ის მფლობელი გახდა. როგორც "ალდაგი ბისიაის" გენერალური დირექტორი ნიკა გამყრელიძე აცხადებს, ამ დროისათვის კომპანია მოლაპარაკებებს აწარმოებს მინოტარულ აქციონერებთან, რათა "ადლაგი ბისიაი" "იმედი ელის" აქციათა 100 %-ის მფლობელი გახდეს. ნიკა გამყრელიძის განმარტებით, კომპანიათა შერწყმის პროცესი უკვე მიმდინარეობს და პირველ ეტაპზე ორივე კომპანია საკუთარ საქმიანობას კვლავ დამოუკიდებლად გააგრძელებს. "ადლაგი ბისიაის" მენეჯმენტის განმარტებით, ამ დრომდე გადაწყვეტილი არ არის ბაზარზე ორივე ბრენდი დარჩება, თუ კომპანიის დასახელებაში რაიმე კორექტირება შევა.
ეროვნული ბანკის ანგარიშის მიხედვით, 2011 წლის მესამე კვარტლის მონაცემებით, სადაზღვევო კომპანია "ალდაგი ბისიაი" ბაზრის 17,1 %-ს ფლობს, ხოლო '"იმედი ელი" კი 16 %-ს.
აღსანიშნავია, რომ გაერთიანების შედეგად კომპანიის საცალო მომხმარებელთა რაოდენობა 420 ათას გადააჭარბებს. ასევე მნიშვნელოვნად გამსხვილდება "ალდაგი ბისიაის" მფლობელობაში მყოფი ჯანდაცვის ბიზნესი, სადაც ჰოსპიტალების რაოდენობა 26 მიაღწევს 1200-ზე მეტი ჰოსპიტალური საწოლით.
"საქართველოს ბანკმა" სადაზღვევო კომპანია "ალდაგი ბისიაის" კაპიტალი შეივსო დამატებით 32,5 მილიონი დოლარით, რის შედეგადაც "ალდაგი ბისიაის" საკუთარი კაპიტალის ოდენობამ 77 მლნ ლარს გადააჭარბა. გაერთიანების შედეგად, "ალდაგი ბისიაი" სადაზღვევო ბაზარზე ყველაზე დიდი კაპიტალის მქონე კომპანია გახდება, რაც მისი კლიენტების კიდევ უფრო მეტი სტაბილურობისა და მომსახურების მაღალი ხარისხის გარანტი იქნება.
"მოხარული ვარ, რომ ეს გარიგება წარმატებით დასრულდა და მინდ მივულოცო, როგორც აქციონერებს, ასევე კომპანიის თითოეულ თანამშრომელს. სადაზღვევო და ჯანდაცვის ბაზარზე, ჩვენი გამსხვილება ჩვენ მიერ გაცხადებული სტრატეგიის შედეგია, რაც თავის მხრივ ხელს შეუწყობს ჩვენი მომხმარებლისთვის კიდევ უფრო სტაბილური და ხარისხიანი სერვისის მიწოდებას"- განაცხადა "ალდაგი ბისიაის" გენერალურმა დირექტორმა ნიკა გამყრელიძემ.
