საქართველოს სახალხო დამცველმა ქუთაისში ჟურნალისტთა უფლებების დარღვევის ფაქტთან დაკავშირებით განცხადება გაავრცელა.
საუბარია საინფორმაციო საშუალებებით გავრცელებულ ინფორმაციიაზე, რომლის თანახმად, 2012 წლის 2 მაისს, ქუთაისის დღესთან დაკავშირებით ლადო მესხიშვილის თეატრში გამართულ ღონისძიებაზე ჟურნალისტთა და მედია საშუალებათა ნაწილი არ დაუშვეს.
" 3 მაისს, საინფორმაციო საშუალებებით გავრცელდა ინფორმაცია, რომლის თანახმად, ქუთაისის ოპერისა და ბალეტის თეატრში, ადგილობრივი თვითმმართველობისა და ,,ნაციონალური მოძრაობის" აქტივისტებთან შეხვედრაზე არ დაუშვეს ადგილობრივი გაზეთის, ,,P.S."-ის ჟურნალისტი ირაკლი ვაჩიბერაძე. მისი განცხადებით, იგი ოთხმა უცნობმა, სამოქალაქო ფორმაში ჩაცმულმა ადამიანმა ცემა და წაართვა აპარატურა, რომელიც მოგვიანებით, ასევე უცნობმა პირმა დაუბრუნა", - აღნიშნავს სახალხო დამცველი.
საქართველოს სახალხო დამცველმა დაიწყო აღნიშნული ფაქტების შესწავლა.
"2012 წლის 3 მაისს საქართველოს სახალხო დამცველის წარმომადგენლები შეხვდნენ და ახსნა-განმარტებები ჩამოართვეს სააგენტო ,,პირველი"-ს კორესპონდენტ ნოდარ ჯოჯუას, რადიო ,,ძველი ქალაქისა" და გაზეთ ,,ვერსიას" ჟურნალისტ თორნიკე ხურციძეს, გაზეთ ,,P.S"-ის ჟურნალისტ ირაკლი ვაჩიბერაძესა და ტელეკომპანია ,,მეგა-TV"-ის ჟურნალისტ ალეკო გვეტაძეს.
საქართველოს სახალხო დამცველი ახსნა-განმარტებებისა და საქმის გარშემო არსებული მასალის სრულყოფილი შესწავლის შემდგომ მოახდენს შესაბამის რეაგირებას", - აღნიშნულია განცხადებაში.