ბათუმმა დღეს ქართულ-თურქულ ბიზნესფორუმს უმასპინძლა. აჭარის სავაჭრო-სამრეწველო პალატის ინფორმაციით, ფორუმში იზმირის სავაჭრო-სამრეწველო პალატის 84-კაციანმა დელეგაციამ, ქართველმა ბიზნესმენებმა და მთავრობის წარმომადგენლებმა მიიღეს მონაწილეობა. თურქი ბიზნესმენები სოფლის მეურნეობის, სამშენებლო, ტურიზმის, ტექსტილის და სხვა ეკონომიკის სფეროებში მოღვაწეობენ.
ფორუმი აჭარის მთავრობის თავმჯდომარემ გახსნა. ლევან ვარშალომიძემ ზღვისპირა ქალაქში მიმდინარე და განხორციელებულ მასშტაბურ პროექტებზე, საინვეტიციო და ტურისტულ პოტენციალზე ისაუბრა. ასევე ფორუმზე მისასალმებელი სიტყვით გამოვიდა აჭარის სავაჭრო-სამრეწველო პალატის პრეზიდენტი, იზმირის სავაჭრო-სამრეწველო პალატის პრეზიდენტი და თურქეთის რესპუბლიკის გენერალური კონსული ქ. ბათუმში.
ფორუმის ფარგლებში გაიმართა პრეზენტაციები აჭარის საინვესტიციო გარემოსა და ქ. იზმირის შესახებ. აგრეთვე ფორუმის დროს გაიმართა ორმხრივი შეხვედრები, სადაც დაინტერესებულ კომპანიებს შესაძლებლობა ჰქონდათ მოლაპარაკებები გაემართათ მათთვის პოტენციურ ბიზნესპარტნიორებთან და მთავრობის წარმომადგენლებთან.
22 მაისს ქ. იზმირში ხელი მოეწერება დაძმობილების მემორანდუმს აჭარის სავაჭრო-სამრეწველო და იზმირის სავაჭრო-სამრეწველო პალატებს შორის.