საქართველოს ბანკი მომხმარებელს მობილბანკის მომსახურებას სთავაზობს 2008 წლის მაისიდან. საქართველოს ბანკის მობილბანკის პაკეტი აქამდე მოიცავდა PDA ბანკს, WAP ბანკს, Java ბანკსა და SMS ბანკს, რაც უზრუნველყოფდა მომსახურების მიღებას ნებისმიერი თაობისა და მოდელის მობილურით. დღეიდან, მობილბანკის პლატფორმების ჩამონათვალს შეემატა საქართველოს ბანკის უახლესი თაობის პროგრამა iPhone და iPod touch-ებისთვის.

აღსანიშნავია, რომ საქართველოს ბანკის მიერ შემუშავებული მობილბანკი iPhone-სთვის არის ე.წ. native application, რაც ნიშნავს იმას, რომ პროგრამა მთლიანად ტელეფონის მეხსიერებაში ინახება და ინტერნეტს მხოლოდ მცირე რაოდენობით - მონაცემების განახლებისათვის მოიხმარს. ეს არის სრულფასოვანი პროგრამა, რომელიც აკმაყოფილებს iPhone-ის პლატფორმის ყველა მოთხოვნას, ხოლო მისი ჩამოტვირთვა და განახლება მარტივად ხდება Apple-ის ოფიციალური პორტალიდან AppStore.

საქართველოს ბანკი პირველი ქართული ბანკია, რომელმაც 2012 წელს საკუთარი პროგრამა (QR კოდის წამკითხველი) განათავსა AppStore-ში. მობილბანკის პროგრამის განთავსება AppStore-ში დღეს მოხდება, ხოლო გადმოწერისათვის ხელმისაწვდომი 2012 წლის მაისის ბოლომდე გახდება.

მობილბანკის ახალი პროგრამით სარგებლობა ძალიან მარტივია. ავტორიზაციისთვის მომხმარებელს შეუძლია გამოიყენოს იგივე პაროლი და სახელი, რასაც ინტერნეტბანკში იყენებს. მობილბანკით შესაძლებელია, მომხმარებელმა მართოს საკუთარი ანგარიშები და ბარათები, აწარმოოს გადარიცხვები, გააგზავნოს გზავნილი „ელვა", გადაიხადოს კომუნალური და სხვა გადასახადები, მიიღოს ამონაწერი საკუთარ ანგარიშებზე შესრულებული ტრანზაქციების შესახებ, იპოვოს საქართველოს ბანკის უახლოესი ბანკომატი ან სერვისცენტრი, მარტივად დაუკავშირდეს ბანკის სატელეფონო ცენტრს, საჭიროების შემთხვევაში დაბლოკოს საკუთარი პლასტიკური ბარათი, შეცვალოს პაროლი, მომხმარებლის სახელი, ნახოს American Express-ის ბონუსპროგრამის ფარგლებში დაგროვილი MR ქულების ან CashBack-ის მოცულობა და სხვა. მობილბანკის მთავარ მენიუში, მომხმარებელს ასევე დახვდება ვალუტის კურსი და ვალუტის კალკულატორი, რომლის მეშვეობითაც ოპერატიულად შეძლებს გამოთვალოს სასურველი თანხის ექვივალენტი უცხოურ ვალუტაში. მობილბანკით მომხმარებელს შესაძლებლობა ექნება შექმნას შაბლონები მის მიერ ყველაზე ხშირად მოხმარებად საბანკო ოპერაციებზე, რაც ზოგავს საბანკო ოპერაციის შესასრულებლად საჭირო დროს და ამარტივებს მათ განხორციელებას.

მობილბანკი - გადახდების დახმარებით, მომხმარებელს შეუძლია ტელეფონიდან გადაიხადოს კომუნალური და სხვა გადასახადები.
მობილბანკი - ანგარიშებით მომხმარებელი სრულად აკონტროლებს საკუთარ ანგარიშებს. მას შეუძლია შეამოწმოს მიმდინარე ანგარიში, ანაბრები, სესხები და საკრედიტო ბარათების მდგომარეობა. ანაბრების კატეგორიაში მომხმარებელი შეძლებს ნახოს მისი ანაბრის სტატუსი, ანაბრის ტიპი, თანხა, ანგარიშის ნომერი, ანაბრის ვადის გასვლის თარიღი და ანაბარზე დარიცხული საპროცენტო განაკვეთი. სესხების კატეგორიაში კი მომხმარებელს შეუძლია შეამოწმოს საკუთარი სესხი, სესხის ტიპი, დარჩენილი ძირი, გრაფიკით გათვალისწინებული დასაფარი თანხის მოცულობა და გადახდის თარიღი, სესხის ვადა და წლიური საპროცენტო განაკვეთი. აგრეთვე, მიიღოს დეტალური ამონაწერი. საკრედიტო ბარათების კატეგორიაში, ნაჩვენებია საკრედიტო ბარათის ლიმიტი, ათვისებული და ხელმისაწვდომი თანხა, მინიმალური გადასახადი და სესხის დაფარვის ბოლო ვადა.
მობილბანკის - გადარიცხვები საშუალებას აძლევს მომხმარებელს, მობილური ტელეფონით აწარმოოს გადარიცხვები საკუთარ ან სხვის ანგარიშებზე საქართველოს ბანკში.
მობილბანკის - გზვანილებით კი საქართველოს ნებისმიერ ქალაქში, შესაძლებელია გზავნილი „ელვას" გადარიცხვა, რომელსაც მიმღები საქართველოს ბანკის ნებისმიერ სერვისცენტრში ან ბანკომატში, უბარათოდ გაანაღდებს.

საქართველოს ბანკის მობილბანკით სარგებლობა, უახლოეს მომავალში შესაძლებელი იქნება iPad-ში, Android-სა და BlackBerry-ის მობილურ ტელეფონებში.