ლიბანური ბიზნესი საქართველოში ინვესტირებით ინტერესდება. როგორც დღეს სავაჭრო-სამრეწველო პალატის პრეზიდენტმა კახა ბაინდურაშვილმა განაცხადა, ლიბანური სამშენებლო კომპანია საქართველოში ოპერირების დაწყებითაა დაინტერესებული. ბაინდურაშვილის განმარტებით, კომპანიის წარმომადგენლები, ადგილობრივი ბაზრის შესასწავლად საქართველოში უკვე იმყოფებოდნენ და სამომავლოდ საქართველოში ოპერირების დაწყებასაც აპირებენ. ბაინდურაშვილის თქმით, ქართული ბაზრის ათვისებით დაინტერესებულნი არიან ასევე ლიბანური ფარმაცევტული კომპანიებიც. როგორც ცნობილია, სავაჭრო-სამრეწველო პალატამ ლიბანში შეხვედრები უკვე გამართა და ლიბანურ ბიზნეს ქართული ბიზნესგარემოს შესახებ ინფორმაცია მიაწოდა. როგორც ბაინდურაშვილი აცხადებს, ლიბანი ძალიან საინტერესო ქვეყანაა, რომელიც დიდი როლს თამაშობს არაბული ქვეყნების ეკონომიკაში.
სავაჭრო-სამრეწველო პალატის პრეზიდენტი განმარტავს, რომ იანვარ-აპრილი ბიზნესისთვის არა აქტიური პერიოდია, რადგანაც ამ პერიოდში ბიზნესი ახალ პროექტებზე და წინადადებებზე მუშაობს. სწორედ ეს პერიოდი გამოიყენა სავაჭრო-სამრეწველო პალატამ და წლის დასაწყისიდან რამდენიმე ქვეყანაში შეხვედრები გამართა, რათა ინვესტორების დაინტერესება მოეხდინა. როგორც ბაინდურაშვილმა განაცხადა ყველაზე მნიშვნელოვანი ამ მიმართულებით ლიბანში, კატარში, გერმანიაში და იტალიაში გამართული შეხვედრები იყო. სავაჭრო-სამრეწველო პალატის პრეზიდენტის განმარტებით, მნიშვნელოვანი შეხვედრები იგეგმება ასევე ლონდონში, სამხრეთ კორეასა და ჩინეთში.
