პერტაიას განმარტებით, პარლამენტში წარდგენილი ანგარიში 2011 წლის მონაცემებს მოიცავს და ის მთლიანად ბიზნესგარემოს შეფასებაა.

"ანგარიშში ასახულია გადასახადების გადამხდელების უფლებების დაცვის კუთხით თუ რა მდგომარეობა იყო 2011 წელს, რა გაუმჯობესდა და რა პრობლემები დარჩა სექტორში.
ბიზნესის მდგომარეობა 2011 წელს 2010 წელთან შედარებით გაუმჯობესებულია. ძალიან ბევრი მნიშვნელოვანი საკითხი, რომელიც წლების განმავლობაში გადასაჭრელი იყო გადაიჭრა. მნიშვნელოვანია, რომ შემოსავლების სამსახურმა აირჩია პარტნიორული ურთიერთობა ბიზნესთან. დიდ პრობლემა რაც წლის დასაწყისში იყო მოგვარებულია და ახლა დარჩენილია სპეციფიკური პრობლემები და მის გადაწყვეტაზე ვმუშაობთ და ნაწილი პარლამენტში განსახილველად უკვე წარდგენილია", - აღნიშნა გიორგი პერტაიამ.

როგორც ბიზნესომბუდსმენის აპარატში განმარტავენ, ანგარიშში განხილულია 2011 წელს გამოვლენილი ის ძირითადი საკითხები, რომლებიც აღნიშნულ პერიოდში აქტუალური იყო ბიზნესისათვის და რომელთა შესახებ რეკომენდაციები წარდგენილ იქნა მთავრობისადმი. აპარატის მიერ დამუშავებულ იქნა 882 მომართვა.

საანგარიშო პერიოდში ბიზნესომბუდსმენისა და აღმასრულებელი ხელისუფლების სხვადასხვა უწყების თანამშრომლობის შედეგად გათვალისწინებული და მოგვარებული იქნა წარდგენილი რეკომენდაციების 54%, ხოლო 46% განხილვის პროცესშია, დარეგულირდა ისეთი მნიშვნელოვანი საკითხები, როგორიცა: ამნისტია ხანდაზმულ, არაღიარებულ დარიცხვებზე - გადამხდელს ჩამოეწერა დავალიანება, რომელიც არ არის აღიარებული და გასულია საგადასახადო მოთხოვნის წარდგენის ხანდაზმულობის ვადა; ქრონომეტრაჟის ჯარიმის გაუქმება; ფინანსთა სამინისტროს სისტემაში დავის განმხილველ ორგანოს მიენიჭა უფლება დავის დროს შემსუბუქებელი ნორმა გამოყენოს; საგადასახადო მოთხოვნის გასაჩივრების ვადა 20-დან 30 დღემდე გაიზარდა; შესაძლებელი გახდა საწარმოო/ბუნებრივი დანაკარგების ნორმების განსაზღვრა; გამარტივდა ფიზიკური პირებისაგან სოფლის მეურნეობის პროდუქციის შესყიდვის პროცესი - რესტორნის ბიზნესში შესაძლებელი გახდა 20%-იანი ხარჯის გამოქვითვა დოკუმენტაციის გარეშე; განისაზღვრა საწვავის ჩამოწერის წესი და სხვა