"ქრისტიან-დემოკრატები" სადაზღვევო პოლისით ანაზღაურებადი მედიკამენტების სიის გაფართოვებას, მაღალტექნოლოგიური გამოკვლევებისა და სარეაბილიტაციო პროგრამების დაფინანსებას ითხოვენ. ამის შესახებ დღეს გამართულ ბრიფინგზე ფრაქცია „ქრისტიან-დემოკრატების" წევრმა მაგდა ანიკაშვილმა განაცხადა.
მისი თქმით, მიუხედავად იმისა, რომ სექტემბრიდან ჯანმრთელობის დაზღვევის სახელმწიფო პროგრამა ფართოვდება, ხელისუფლება ყველაზე სერიოზული პრობლემის მოგვარებაზე უარს ამბობს.
ანიკაშვილის განცხადებით, უნდა მოხდეს სადაზღვევო პოლისით ანაზღაურებადი მედიკამენტების სიის გაფართოვება, ე.წ. მაღალტექნოლოგიური გამოკვლევების არანაკლებ 80 პროცენტიანი თანაგადახდისა და შეზღუდული შესაძლებლობის მქონე პირებისთვის სარეაბილიტაციო პროგრამების დაფინანსება.
დეპუტატი მიესალმება სადაზღვევო კომპანიების მიერ, სექტემბრიდან, წლის განმავლობაში მედიკამენტების 100 ლარამდე აანაზრაურებას. თუმცა, მისი თქმით, მედიკამენტები, რომლებიც მედიკოსებს დანიშნულებაში შეაქვთ, ხშირად პოლისით დადგენილ სიაში არ არის, მათ შორის ანტიბიოტიკები.
რაც შეეხება ე.წ. მაღალტექნოლოგიურ გამოკვლევებს, ანიკაშვილის განმარტებით, სახელმწიფო პოლისით, კომპიუტერული ტომოგრაფიისა და მაგნიტორეზონანსული კვლევის 20 პროცენტიანი თანაგადახდა არის გათვალისწინებული.
„გამოკვლევები იმდენად ძვირია, რომ 20 პროცენტის გადახდა პრობლემას ვერ აგვარებს. პენსიონერმა 300 ლარი, როგორ უნდა გადაიხადოს, მაშინ, როდესაც მისი პენსია სექტემბრიდან 125 ლარი იქნება. 20 პროცენტის - 60 ლარის ანაზღაურება საკმარისი არ არის. ეს პუნქტი რეალიზებული არ იქნება. მიგვაჩნია, რომ პენსიონერს მინიმუმ 80 პროცენტი უნდა აუნაზღაურონ,"- აღნიშნა დეპუტატმა.
მისივე თქმით, აღნიშნული წინადადებები საკანონმდებლო ინიციატივას არ საჭიროებს და ძირითადად საკითხები კანონქვემდებარე აქტებით რეგულირდება, ამიტომ ანიკაშვილი რეკომენდაციით აღმასრულებელ ხელისუფლებას მიმართავს. დეპუტატმა ხაზი გაუსვა, რომ სადაზღვევო პაკეტში ამ პუნქტების დამატება მის საერთო ღირებულებას არ გაზრდის.
