საქართველოს კონტროლის პალატა სახალხო დამცველის მიმართვას ეხმიანება. კონტროლის პალატის თავმჯდომარის მოადგილის, თინა ბოკუჩავს ვიდეოგანცხადება უწყების ვებგვერდზე განთავსდა. ბოკუჩავს თქმით, კონტროლის პალატა პოლიტიკურ კორუფციასთან მიმართებაში მოქმედებდა და გააგრძელებს საქმიანობას კანონმდებლობით განსაზღვრულ ჩარჩოებში.
მისივე განცხადებით, პოლიტიკური მონიტორინგის სამსახური ახალშექმნილია და მნიშვნელოვანია, მისი საქმიანობის დახვეწა მომავალში კონსტრუქციულ გარემოში მიმდინარეობდეს.
"გარკვეული სიახლეები უკვე დანერგილია ჩვენს საქმიანობაში, მაგალითად, თანამედროვე ტექნიკური საშუალებების გამოყენება, მოქალაქეთა კონსულტანტის პოზიციის შემოღება და სხვა", - ამბობს ვიდეოგანცხადებაში ბოკუჩავა და აღნიშნავს, რომ კონტროლის პალატა აქტიურად თანამშრომლობს სამოქალაქო სექტორთან და საერთაშორისო საზოგადოებასთან, რათა კიდე უფრო დაიხვეწოს საქმიანობის პროცედურები და აისახოს შესაბამისი მეთოდოლოგიის დოკუმენტში.
სახალხო დამცველმა კონტროლის პალატის ფინანსური მონიტორინგის სამსახურის მიერ 2012 წლის მარტში მოქალაქეთათვის ახსნა-განმარტებების ჩამორთმევის მასალების შესწავლისას არა ერთი კონკრეტული უფლებადარღვევის ფაქტი დააფიქსირა. სახალხო დამცველმა შესაძლო უფლებადარღვევათა ფაქტების შესწავლა 15 მარტს საკუთარი ინიციატივით დაიწყო და შესაბამისი რეკომენდაციები და წინადადებები კონტროლის პალატის თავმჯდომარეს, ლევან ბეჟაშვილს გაუგზავნა.
სახალხო დამცველმა კონტროლის პალატას მიმართა წინადადებით, დაიწყოს დისციპლინური წარმოება იმ მოხელეთა მიმართ, რომელთა ქმედებებმაც კონკრეტულ შემთხვევებში უკვე ხელყო მოქალაქეთა უფლებები და თავისუფლებები.
