პარლამენტში ბიზნესომბუდსმენს ელოდებიან. დღეს, 2 მაისს, ბიზნესომბუდსმენი, გიორგი პერტაია, საგადასახადო კოდექსის 42-ე მუხლის მე-7 ნაწილის თანახმად პარლამენტის საფინანსო-საბიუჯეტო კომიტეტს, წლიური ანგარიშის პრეზენტაციას გადამხდელთა უფლებრივი მდგომარეობისა და 2011 წლის განმავლობაში გაწეული საქმიანობის შესახებ, წარუდგენს.
როგორც ბიზნესომბუდსმენის აპარატში განმარტავენ, ანგარიშში განხილულია 2011 წელს გამოვლენილი ის ძირითადი საკითხები, რომლებიც აღნიშნულ პერიოდში აქტუალური იყო ბიზნესისათვის და რომელთა შესახებ რეკომენდაციები წარდგენილ იქნა მთავრობისადმი. აპარატის მიერ დამუშავებულ იქნა 882 მომართვა.
საანგარიშო პერიოდში ბიზნესომბუდსმენისა და აღმასრულებელი ხელისუფლების სხვადასხვა უწყების თანამშრომლობის შედეგად გათვალისწინებული და მოგვარებული იქნა წარდგენილი რეკომენდაციების 54%, ხოლო 46% განხილვის პროცესშია, დარეგულირდა ისეთი მნიშვნელოვანი საკითხები, როგორიცა: ამნისტია ხანდაზმულ, არაღიარებულ დარიცხვებზე - გადამხდელს ჩამოეწერა დავალიანება, რომელიც არ არის აღიარებული და გასულია საგადასახადო მოთხოვნის წარდგენის ხანდაზმულობის ვადა; ქრონომეტრაჟის ჯარიმის გაუქმება; ფინანსთა სამინისტროს სისტემაში დავის განმხილველ ორგანოს მიენიჭა უფლება დავის დროს შემსუბუქებელი ნორმა გამოყენოს; საგადასახადო მოთხოვნის გასაჩივრების ვადა 20-დან 30 დღემდე გაიზარდა; შესაძლებელი გახდა საწარმოო/ბუნებრივი დანაკარგების ნორმების განსაზღვრა; გამარტივდა ფიზიკური პირებისაგან სოფლის მეურნეობის პროდუქციის შესყიდვის პროცესი - რესტორნის ბიზნესში შესაძლებელი გახდა 20%-იანი ხარჯის გამოქვითვა დოკუმენტაციის გარეშე; განისაზღვრა საწვავის ჩამოწერის წესი და სხვა
გადამხდელებთან კომუნიკაციის და მათგან ინფორმაციის მიღების წყაროს წარმოადგენდა პირადი შეხვედრები, წერილები, კონფერენციები, ცხელი ხაზი, Facebook და ვებ-გვერდი (ელექტრონული წერილები). ანგარიშის სრული ვერსია ხელმისაწვდომია ბიზნეს ომბუდსმენის ვებ-გვერდზე www.businessombudsman.ge