საქართველომ ევროპის საავიაციო უსაფრთხოების სააგენტოსა (EASA) და ევროპის სამოქალაქო ავიაციის კონფერენციის წევრ სახელმწიფოთა ერთობლივი ტრეინინგების საინიციატივო ჯგუფის შეხვედრას უმასპინძლა.
სამოქალაქო ავიაციის სააგენტოს ინფორმაციით, შეხვედრის მიზანს წარმოადგენდა სამოქალაქო ავიაციაში სერტიფიცირებისა და ზედამხელველობის პროცესში ჩართული პერსონალის ტრეინინგების საჭიროების განსაზღვრა. ჯგუფის მიერ მიღებული გადაწყვეტილებები მიიჩნევა საუკეთესო ერთობლივი გამოცდილების, რჩევებისა და პრაქტიკის ურთიერთგაზიარებად.
საქართველოს სამოქალაქო ავიაციის სექტორში მიმდინარე მოვლენების, კერძოდ ევროპის ქვეყნების საავიაციო თანამეგობრობის სივრცეში საქართველოს ინტეგრაციისა და კანონმდებლობის ჰარმონიზაციის ამ ეტაპზე, მნიშვნეოლოვანი როლი ენიჭება აღნიშნულ შეხვედრაში საქართველოს მონაწილეობასა და წარმოდგენილი შესაძლებლობების ოპტიმალურად გამოყენებას.