ქუთაისში კოპიტნარის აეროპორტის მშენებლობის პროექტის მართვის ჯგუფის შეხვედრა გაიმართა. შეხვედრა ეკონომიკისა და მდგრადი განვითარების მინისტრის ხელმძღვანელობით ქუთაისის მთავრობის სახლში ჩატარდა, მასში მონაწილეობა მიიღეს ეკონომიკისა და მდგრადი განვითარების მინისტრის მოადგილემ, გიორგი კარბელაშვილმა და მართვის ჯგუფის სხვა წევრებმა. ამასთან, სხდომაზე მიწვეულნი იყვნენ კოპიტნარის აეროპორტის მშენებლობაში მონაწილე კომპანიების წარმომადგენლები და არქიტექტორები.
მართვის ჯგუფის წევრები კოპიტნარის აეროპორტის მშენებლობის მხრივ არსებულ მდგომარეობას გაეცნენ. მინისტრმა და ჯგუფის სხვა წევრებმა პირადად, ადგილზე დაათვალიერეს კოპიტნარის აეროპორტის მშენებლობის პროცესი, მათ შორის ტერმინალის, ნავიგაციის, სამეთვალყურეო კოშკურის ნაწილი და ასაფრენ ზოლზე მიმდინარე სამუშაოები. ჯგუფის წევრებმა ინფორმაცია უშუალოდ სამშენებლო სამუშაოებში ჩართული სპეციალისტებისგან მიიღეს.
ვერა ქობალიას ინფორმაციით, ქუთაისის აეროპორტი 2012 წლის შემოდგომაზე უკვე საერთაშორისო რეისებს მიიღებს. მინისტრის განცხადებით, ასაფრენი ზოლის 9000 ფილა მთლიანად იქნება შეცვლილი, რათა ქუთაისის აეროპორტმა ნებისმიერი ტიპის თვითმფრინავის მიღება შეძლოს. "ეს იქნება უზარმაზარი მნიშვნელობის პროექტი როგორც რეგიონის, ისე მთელი საქართველოს მასშტაბით, მათ შორის მოსახლეობის დასაქმების მხრივ. ქუთაისის ახალი აეროპორტი ჩვენს მოქალაქეებს იაფი მგზავრობის საშუალებას მისცემს, უცხოელებს კი საქართველოში ბიზნესისა თუ დასვენების მიზნით ჩამოსვლას კიდევ უფრო გაუმარტივებს" - აღნიშნა ვერა ქობალიამ.
ეკონომიკისა და მდგრადი განვითარების მინისტრის მოადგილის, გიორგი კარბელაშვილის ინფორმაციით, მშენებლობის პროცესი სრული დატვირთვით მიმდინარეობს, ეს იქნება ახალი, საერთაშორისო სტანდარტების შესაბამისი, სრული ინფრასტრუქტურით უზრუნველყოფილი აეროპორტი. ამასთან, გიორგი კარბელაშვილის განცხადებით, ტექნოლოგიების მონტაჟი უკვე დასრუელბის პროცესშია და მაისის ბოლოს მათი ტესტირება მოხდება.
ქუთაისის საერთაშორისო აეროპორტი ხელს შეუწყობს საქართველოს ავიაბაზარზე დაბალტარიფიანი ავიაკოპანიების მოზიდვას. ფრენები განხორცილედება როგორც რეგიონის, ასევე ევროპისა და აზიის მიმართულებით.
პროექტის მართვის უწყებათაშორისი ჯგუფი საქართველოს მთავრობის 2011 წლის 1 ივლისის განკარგულების საფუძველზე შეიქმნა და მასში შედიან საქართველოს პარლამენტის, მთავრობის კანცელარიის, ეკონომიკისა და მდგრადი განვითარების სამინისტროს, რეგიონული განვითარებისა და ინფრასტრუქტურის სამინისტროს, ფინანსთა სამინისტროს, ენერგეტიკის და ბუნებრივი რესურსების სამინისტროს, შინაგან საქმეთა სამინისტროს, თავდაცვის სამინისტროს, შპს "საქაერონავიგაციის", შპს "საქართველოს რკინიგზის", შპს "საქართველოს აეროპორტების გაერთიანების", სამოქალაქო ავიაციის სააგენტოს, იმერეთში პრეზიდენტის რწმუნებულის ადმინისტრაციის და ქ. ქუთაისის მერიის წარმომადგენლები
