იანვარ-აპრილში საქართველო 978 ათას 521 ვიზიტორმა მოინახულა. შსს-ს ინფორმაციით, 2011 წელს საქართველო 2 მლნ 822 ათას 363 პირმა მოინახულა. რაც შეეხება 2012 წლის პირველ 4 თვეს, ქვეყანას უკვე 978 521 პირი ეწვია. უშუალოდ აპრილში საქართველოში 301 ათას 243 ვიზიტორი შემოვიდა, რაც 2011 წლის იგივე საანგარიშო პერიოდთან შედარებით 61 პროცენტით აა გაზრდილი. შსს-ს ინფორმაციით, წელს ვიზიტორთა რაოდენობა იანვარ-აპრილში 2011 წლის ანალოგიურ პერიოდთან შედარებით 45%-ითაა გაზრდილი.
4 თვეში საქართველოში ყველაზე მეტი ვიზიტორი შემოვიდა თურქეთიდან, აზერბაიჯანიდან, სომხეთიდან, რუსეთიდან, უკრაინიდან და ირანიდან. ასევე მნიშვნელოვანი მატება იყო ევროკავშირის ქვეყნების მიმართულებიდანაც, საიდან ჩამოსული სტუმრების რაოდენობამაც უკრაინისა და ირანის მაჩვენებლებსაც გადააჭარბა. უნდა აღინიშნოს განსაკუთრებული დაინტერესება მოლდოვისა და ავსტრიის მოქალაქეების მხრიდან, რომელთაგანაც შესაბამისად 73% და 83%-იანი მატება აღინიშნა.
"როგორც წინა თვის სტატისტიკურმა მონაცემებმა გვიჩვენა, 2012 წლის პირველი მარტიდან საქართველოს პრეზიდენტის ინიციატივით რუსეთის მოქალაქეებისთვის მიმოსვლის უვიზო რეჟიმის დაწესების შემდეგ, საქართველოში მარტის თვეში ამ ქვეყნიდან ჩამოსულ ვიზიტორთა როდენობა საგრძნობლად გაიზარდა და მაგალითისათვის, ლარსის სასაზღვრო გამშვებ პუნქტზე გასამმაგდა კიდეც. უნდა აღინიშნოს, რომ იგივე ტენდენცია შენარჩუნდა და უფრო გამოკვეთილიც კი გახდა აპრილის თვეში, რომელშიც წინა ანალოგიურ საანგარიშო პერიოდთან შედარებით ჯამურმა მატებამ 98% შეადგინა, ხოლო უშუალოდ ლარსის სასაზღვრო გამშვები პუნქტის გავლით რუსეთის ფედერაციიდან ვიზიტორთა ნაკადი კი თითქმის 4-ჯერ გაიზარდა. თუ უშუალოდ სავიზო რეჟიმის გაუქმების თარიღიდან ავითვლით, ვიზების გაუქმების ეფექტიანობის ინდექსი რუსეთიდან ვიზიტორების რაოდენობის კუმულაციურ 80%-იან ზრდაში გამოისახება", - აცხადებენ შსს-ში.
