ბაქო-თბილისი-ერზერუმის გაზსადენის სიმძლავრე შესაძლოა წელიწადში 37 მლრდ კუბ/მ-მდე გაიზარდოს, შესაბამისი განცხადება აზერბაიჯანის მრეწველობისა და ენერგეტიკის მინისტრმა ნატიკ ალიევმა გააკეთა.
"ჩვენ მივაღწიეთ შეთანხმებას კომპანია "ბი-პისთან" ბაქო-თბილისი-ერზერუმის გაზსადენის სიმძლავრისგაზრდის თაობაზე, თურქეთის საზღვრამდე. პირველ ეტაპზე მისი გამტარუნარიანობა წელიწადში 3 მლრდ კუბ/მ იქნება,"- განაცხადა ნატიკ ალიევმა.
მისივე განმარტებით, აღნიშნული გადაწყვეტილება უკავშირდება შაჰ-დენიზიდან გაზის მოპოვების ზრდას, რომელმაც მეორე ეტაპზე 25 მლრდ კუბ/მ-ს უნდა მიაღწიოს. ამჟამად კი 9 მლრდ კუბ/მ-ის მოპოვება ხდება.
ალიევის თქმით, გაზსადენის სიმძლავრე, შესაძლოა, გაიზარდოს 35-37 მლრდ კუბ/მ-მდე, იმ შემთხვევაში, თუ ასევე მიღწეული იქნება გადაწყვეტილება, ტრანსკასპიური გაზსადენის რეალიზაციის შესახებ, რომლითაც მოხდება თურქმენული გაზის ტრანსპორტირება.
აღსანიშნავია, რომ ტრანსასპიური გაზსადენი ერთმანეთს დაუკავშირებს ყაზახეთის თენგიზის საბადოს, თურქმენეთს, ბაქოს, თბილისს, ერზერუმს და მისი საშუალებით ყოველწლიურად 20-30 მლრდ კუბ/მ გაზის ტრანსპორტირება მოხდება. პროექტის ღირებულება 7,9 მლრდ დოლარია.