ელიტ ელექტრონიქსის გენერალური დირექტორის პოზიციაზე დაინიშნა მატი ლეშემი. იგი კომპანიის აქციონერებმა სპეციალურად მოიწვიეს, ვინაიდან მას ძალიან დიდი გამოცდილება აქვს საცალო გაყიდვებისა და ბიზნეს ადმინისტრირების მიმართულებით. ლეშემი არის ამერიკის მოქალაქე, კალიფორნიის უნივერსიტეტის მაგისტრის ხარისხის მფლობელი ბიზნესის ადმინისტრირებაში, ხელმძღვანელობდა რამდენიმე უმსხვილეს კომპანიას ამერიკასა და ისრაელში.

ბოლო 6 თვის განმავლობაში ინვესტორთა ჯგუფი აწარმოებდა გრძელვადიან და ძირეულ მოლაპარაკებებს კომპანიის კრედიტორებთან. მოთხოვნა ელიტ ელექტრონიქსის მდგომარეობის დასტაბილიზებაზე საქართველოს სამი უმსხვილესი ბანკიდან მოდიოდა. ისინი ინვესტორებს სთხოვდნენ დახმარებოდნენ მათი კომპანიის გადარჩენაში და 400-ზე მეტი პირდაპირი თანამშრომლის და 250 არაპირდაპირ დასაქმებული ადამიანის ფინანსური უსაფრთხოების უზრუნველყოფაში მთელი საქართველოს მასშტაბით.

ელიტ ელექტრონიქსის ფულადი დავალიანების მთლიანი თანხა 2009 წლისთვის 42 მილიონ ლარს შეადგენდა. ინვესტორთა ჯგუფმა კომპანიის გადასარჩენად მასშტაბური ინვესტიცია განახორციელა და ფინანსები გაიღო ფულადი დავალიანების შესამცირებლად. ეს დავალიანება საგრძნობლად შემცირდა. ასევე ინვესტორთა ჯგუფმა აიღო ვალდებულება სახელმწიფოს წინაშე არსებული დავალიანებების გადაფარვაზე.

"ელიტ ელექტრონიქსი დღეისთვის ყველაზე დიდი საცალო ქსელითაა წარმოდგენილი, კომპანია როგორც გაყიდვების, ასევე პროდუქციის მრავალფეროვნების მიხედვით ქართული ბაზრის ლიდერია. ჩვენი მიზანია ეს პოზიცია კიდევ უფრო გავამყაროთ, მომხმარებელს კიდევ უფრო დიდი არჩევანი შევთავაზოთ ახალი ბრენდების მიმართულებით, უახლოეს მომავალში კიდევ რამოდენიმე ფილიალის გახსნა იგეგმება ქვეყნის მასშტაბით. ელიტ ელექტრონიქსი თავის ერთგულ მომხმარებელს უახლესი პროდუქციის ფართო არჩევანს, საუკეთესო მომსახურებას, საუკეთესო ხარიხსა და განსაკუთრებულ ფასებს შესთავაზებს", - განაცხადა ელიტ ელექტრონიქსის გენერალურმა დირექტორმა მატი ლეშემმა.