იანვარ-მარტში ათი უმსხვილესი სავაჭრო პარტნიორის წილმა საქართველოს მთლიან საგარეო სავაჭრო ბრუნვაში 66 პროცენტი შეადგინა. "საქსტატის" ინფორმაციით, უმსხვილესი სავაჭრო პარტნიორებია თურქეთი (324 მლნ. აშშ დოლარი), აზერბაიჯანი (282 მლნ. აშშ დოლარი) და გერმანია (163 მლნ. აშშ დოლარი).
სასაქონლო ჯგუფებიდან საექსპორტო ათეულში პირველი ადგილი კვლავ მსუბუქმა ავტომობილებმა დაიკავა და 105 მლნ. აშშ დოლარი შეადგინა, მთელი ექსპორტის 20 პროცენტი. ფეროშენადნობების ექსპორტი უდრიდა 59 მლნ. აშშ დოლარს, ხოლო მისი წილი მთლიან ექსპორტში - 11 პროცენტს. მესამე ადგილზე თხილის ჯგუფი დაფიქსირდა. ამ სასაქონლო ჯგუფის ექსპორტმა 40 მლნ. აშშ დოლარი და მთელი ექსპორტის 8 პროცენტი შეადგინა.
2012 წლის იანვარ-მარტში საქართველოში საქონლით საგარეო სავაჭრო ბრუნვამ (არაორგანი-ზებული ვაჭრობის გარეშე) 2244 მლნ. აშშ დოლარი შეადგინა, რაც წინა წლის მაჩვენებელზე 17 პროცენტით მეტია; აქედან ექსპორტი 539 მლნ. აშშ დოლარი იყო (16 პროცენტით მეტი), ხოლო იმპორტი - 1706 მლნ. აშშ დოლარი (17 პროცენტით მეტი). საქართველოს უარყოფითმა სავაჭრო ბალანსმა 2012 წლის იანვარ-მარტში 1167 მლნ. აშშ დოლარი და საგარეო სავაჭრო ბრუნვის 52 - პროცენტი შეადგინა.
"საქსტატის" ინფორმაციით, 2012 წლის იანვარ-მარტში წინა წლებთან შედარებით ექსპორტი გაზრდილია. განსაკუთრებით დიდი ზრდაა 2009 წლის იანვარ-მარტთან შედარებით (147 პროცენტი).