"საქსტატის" ინფორმაციით, დსთ-ის ქვეყნებთან საგარეო სავაჭრო ბრუნვამ 2012 წლის იანვარ-მარტში 715 მლნ აშშ დოლარი შეადგინა (2011 წლის იანვარ-მარტთან შედარებით 7 პროცენტით მეტი), აქედან ექსპორტმა 243 მლნ. აშშ დოლარს მიაღწია (26 პროცენტით მეტი), ხოლო იმპორტმა - 472 მლნ. აშშ დოლარს (1 პროცენტით ნაკლები).
საქართველოს საგარეო სავაჭრო ბრუნვაში დსთ-ის ქვეყნების წილი 32 პროცენტი იყო, მათ შორის ექსპორტში 45 პროცენტი და იმპორტში 28 პროცენტი. (2011 წელს - შესაბამისად 35, 41 და 33 პროცენტი). დსთ-ის ქვეყნებზე მოდიოდა სავაჭრო დეფიციტის 20 პროცენტი (2011 წლის იანვარ-მარტში - 29 პროცენტი). 2012 წლის იანვარ-მარტში, წინა წლის იანვარ-მარტთან შედარებით, აღნიშნულ ქვეყნებთან უარყოფითი სავაჭრო სალდო 20 პროცენტით შემცირდა.
2012 წლის იანვარ-მარტში საქართველოში საქონლით საგარეო სავაჭრო ბრუნვამ (არაორგანი-ზებული ვაჭრობის გარეშე) 2244 მლნ. აშშ დოლარი შეადგინა, რაც წინა წლის მაჩვენებელზე 17 პროცენტით მეტია; აქედან ექსპორტი 539 მლნ. აშშ დოლარი იყო (16 პროცენტით მეტი), ხოლო იმპორტი - 1706 მლნ. აშშ დოლარი (17 პროცენტით მეტი). საქართველოს უარყოფითმა სავაჭრო ბალანსმა 2012 წლის იანვარ-მარტში 1167 მლნ. აშშ დოლარი და საგარეო სავაჭრო ბრუნვის 52 - პროცენტი შეადგინა.
"საქსტატის" ინფორმაციით, 2012 წლის იანვარ-მარტში წინა წლებთან შედარებით ექსპორტი გაზრდილია. განსაკუთრებით დიდი ზრდაა 2009 წლის იანვარ-მარტთან შედარებით (147 პროცენტი).
