თბილისში, სასტუმრო „ქორთიარდ მარიოტში" საქართველო-ჩეხეთის ბიზნესფორუმი გაიხსნა, რომელიც საქართველოს პარლამენტის თავმჯდომარე დავით ბაქრაძემ და ქვეყანაში ვიზიტით მყოფმა ჩეხეთის რესპუბლიკის პარლამენტის სენატის თავმჯდომარე მილან ტეჩმა გახსნეს.
პარლამენტის თავმჯდომარის დავით ბაქრაძის განცხადებით, ჩეხეთ-საქართველოს ურთიერთობები პოლიტიკურ ჩარჩოებს გასცდა, რომელიც ეკონომიკურ თანამშრომლობაზე გადავიდა.
დავით ბაქრაძის შეფასებით, მსგავსი ბიზნეს ფორუმები დამატებითი შესაძლებლობაა იმისთვის, რომ უცხოელი ინვესტორები საქართველოთი დაინტერესდნენ. „იქმნება იმის პერსპექტივა, რომ საქართველოში ჩაიდოს მეტი ინვესტიცია, გაიხსნას ახალი საწარმოები, დასაქმდეს მეტი ადამიანი და შეიქმნას ახალი სამუშაო ადგილები. სწორედ ამიტომ, ჩვენ ყველა ასეთ ღონისძიებას პრიორიტეტულობით ვეკიდებით. ჩეხეთის და საქართველოს ურთიერთობები პოზიტიურად ვითარდება", - განაცხადა დავით ბაქრაძემ.
საქართველოს პარლამენტის პრესსამსახურის ინფორმაციით, საქართველო 22 ქვეყნიდან ერთ-ერთია, რომელთანაც ჩეხეთის რესპუბლიკა განსაკუთრებულ ეკომომიკურ ურთიერთობებს დაამყარებს. ამის შესახებ ჩეხეთის რესპუბლიკის სენატის თავმჯდომარემ მილან შტეხმა განაცხადა. მისი თქმით, ჩეხეთის რესპუბლიკამ 22 ქვეყანასთან ექსპორტის სპეციალური სტრატეგია დაამტკიცა, რომლის თანახმადაც, ჩეხეთი პარტნიორ ქვეყნებში ინფრასტრუქტურის მშენებლობას ხელს შეუწყობს.
„ეს იქნება საწარმოებისა და სხავადასხვა ფირმების აშენება, რომლებიც საჭირო ნივთებს გამოუშვებენ, აღნიშნული კი ხელს შეუწყობს დასაქმებას, რადგან შეიქმნება ახალი სამუშაო ადგილები." - განაცხადა მილან შტეხმა. მისივე განმარტებით, ჩეხეთის რესპუბლიკას სურს მეტად დაეხმაროს კერძო ინვესტიციებს საქართველოში, რადგან საქართველო მიიჩნევა ძალიან მნიშვნელოვან ქვეყნად რეგიონში.
ორდღიანი ბიზნეს ფორუმი საქართველოს ეროვნული საინვესტიციო სააგენტოსა და საქართველოს სავაჭრო-სამრეწველო პალატის ორგანიზებით იმართება. ღონისძიების მიზანი ბიზნესპარტნიორების მოძიება და საქმიანი თანამშრომლობის დამყარებაა. ფორუმის ფარგლებში ორმხრივი შეხვედრები გაიმართება და ქართულ კომპანიებს პოტენციურ ბიზნესპარტნიორებთან საქმიანი მოლაპარაკებების გამართვის შესაძლებლობა ექნებათ. ჩეხეთის რესპუბლიკის დელეგაცია სენატის თავმჯდომარის მილან სტეჩის ხელმძღვანელობით საქართველოს გუშინ ეწვია. დელეგაციაში არიან ბიზნესმენები სოფლის მეურნეობის, დისტრიბუციის, სამრეწველო, სამშენებლო, საკონსულტაციო და საფინანსო სექტორებიდან.