საქართველოში რუსი ტურისტების რაოდენობა იზრდება. სტატისტიკური ინფორმაციის თანახმად, ბოლო სამ თვეში ქვეყანაში შემოსული ტურისტების რაოდენობა 38 %-ითაა გაზრდილი.
როგორც "ჯი-ეიჩ-ენს" ტურიზმის ადმინისტრაციაში, შსს-ს საინფორმაციო-ანალიტიკური დეპარტამენტის საინფორმაციო ცენტრის მონაცემებზე დაყრდნობით განუმარტეს, 2012 წლის იანვარ-მარტში საქართველოს რუსეთიდან 46 ათას 438 ვიზიტორი სტუმრობდა, მაშინ როდესაც გასული წლის პირველ სამ თვეში საქართველოში 33 ათას 732 რუსი ტურისტი იმყოფებოდა.
საინტერესო ფაქტია, რომ საქართველოში რუსი ვიზიტორების ზრდა 2008 წლიდან ფიქსირდება. არსებული სტატისტიკის მიხედვით, 2008 წელს საქართველომ რუსეთიდან 114 ათას 459 რუსი ვიზიტორი მიიღო, მაშინ როდესაც 2007 წელს ქვეყანას რუსეთიდან მხოლოდ 91 ათას 361 ვიზიტორი ეწვია . 2009 წელს საქართველოში - 127 ათას 937 ვიზიტორი, 2010 წელს - 170 ათას 584 ვიზიტორი, ხოლო 2011 წელს - 278 ათას 501 რუსი ვიზიტორი სტუმრობდა.
როგორც ცნობილია ბოლო პერიოდში მთავრობა აქცენს რუს ტურისტებზე აკეთებს. ქვეყნის პირველი პირი თავის გამოსვლებში ხშირად მოუწოდებს რუსეთის მოქალაქეებს, ჩამოვიდნენ საქართველოში და ქვეყნის ტურისტულ პოტენციალს გაეცნონ. ამ მიმართულებით საქართველომ ქმედითი ნაბიჯებიც გადაგდა და რუსეთს სავიზო რეჟიმი მოუხსნა, რაც რუსულ მხარეს არ გაუკეთებია.
თავის მხრივ კი რუსეთის საგარეო საქმეთა სამინისტრომ ქვეყნის მოსახლეობაში საქართველოში ჩამოსვლისკენ თავის შეკავებისკენ მოუწოდა.
თუმცა ლავროვმა საპასუხოდ მიხეილ სააკაშვილისგან ახალი შეთავაზება მიიღო და პრეზიდენტმა მას "ტურ აგენტის" თანამდებობა "შესთავაზა".
ფოტო: ITAR-TASS