საქართველოს პრეზიდენტმა მიხეილ სააკაშვილმა და ენერგეტიკისა და ბუნებრივი რესურსების მინისტრმა ალექსანდრე ხეთაგურმა „ნენსკრაჰესის" მშენებლობას საფუძველი ჩაუყარეს.
ჰესს ჩინური კომპანია „Sinohydro" აშენებს. მესტიაში, მდინარე ნენსკრაზე სეზონური რეგულირების ჰიდროელექტროსადგურის „ნენსკრაჰესის" მშენებლობა 5 წელიწადში დასრულდება. ჰესის დადგმული სიმძლავრე 210 მგვტ-ია, ხოლო წლიური გამომუშავება 1,2 მილიარდ კვტ/საათს შეადგენს. ზამთრის პერიოდში ჰიდროელექტროსადგურის გამომუშავება 260 მლნ კვტ/საათი იქნება.
„ნენსკრაჰესის " მშენებლობაზე 1200 ადამიანი დასაქმდება. პროექტში 630 მლნ აშშ დოლარის ინვესტიცია ჩაიდება. ჰიდროელექტროსადგურის ექსპლუატაციაში გაშვების შემდეგ, შესაძლებელი იქნება თბოელექტროსადგურის ერთი, 120 მგვტ-იანი ენერგობლოკის ჩანაცვლება. ამასთან, ზამთარში „ნენსკრა ჰესი" „ენგურჰესის" წყლის რესურსს გაზრდის და შესაბამისად, საშუალებას მისცემს მას გამოიმუშავოს უფრო მეტი ელექტროენერგია.
კომპანია გამომუშავებულ ელექტროენერგიას ზამთარში შიდა ბაზარზე გაყიდის, ხოლო ზაფხულში ექსპორტზე მეზობელ ქვეყნებში გაიტანს.
საქართველოს მთავრობამ ახალი ჰესების მშენებლობებში ინვესტიციების მოზიდვის ხელშეწყობის მიზნით, სახელმწიფო პროგრამა "განახლებადი ენერგია 2008" შეიმუშავა. პროგრამის ფარგლებში, დღეისათვის საქართველოს რეგიონებში 15 ახალი ჰესი შენდება. 2012-2013 წლებში კი დამატებით 20 ჰიდროელექტროსადგურის მშენებლობა დაიწყება.
პროექტების განხორციელების შედეგად, ენერგოსექტორში 4 მლრდ აშშ დოლარის ინვესტიცია ჩაიდება, შეიქმნება 3 ათასი მგვტ დამატებითი სიმძლავრე, ხოლო განსახორციელებელ სამუშოებზე 13 ათასი ადამიანი დასაქმდება.