აჭარას ინდუსტრიული ზონის შექმნაში თურქეთის სავაჭრო-სამრეწველო პალატებისა და ბირჟების ფედერაცია დაეხმარება. როგორც სააგენტო „ჯი-ეიჩ-ენს“ აჭარის სავაჭრო-სამრეწველო პალატიდან (სსპა) აცნობეს, ასსპა-ს პრეზიდენტი თამაზ შავაძე ანკარაში ვიზიტისას, თურქეთის რესპუბლიკის სავაჭრო-სამრეწველო პალატებისა და ბირჟების ფედერაციის პრეზიდენტს რიფათ ჰისარჯიკოღლუს შეხვდა, რომელმაც მზადყოფნა გამოთქვა, რათა მისმა ბიზნეს გაერთიანებამ აჭარაში ინდუსტრიული ზონის შექმნაში აქტიური მონაწილეობა მიიღოს. ჰისარჯიკოღლუმ აღნიშნა, რომ უახლოეს მომავალში დელეგაციასთან ერთად ესტუმრება ბათუმს, რათა ადგილზე მოხდეს აჭარის რეგიონში ბიზნეს შესაძლებლობების გაცნობა და საინვესტიციო პოტენციალის შესწავლა. ასევე ორგანიზება გაეწევა ერთობლივი ქართულ-თურქული ბიზნეს ფორუმის ჩატარებას. ასსპა-ს პრეზიდენტმა მასპინძელ მხარეს ესაუბრა ინდუსტრიული ზონის შექმნის მიზანშეწონილობასა და ამ კუთხით გადადგმული ნაბიჯებზე. ასევე დასვა საკითხი თავისუფალი ვაჭრობის ხელშეკრულების ფარგლებში ლიცენზიების გაცემის დროს თურქეთის მხარის პროცედურების გამარტივების აუცილებლობაზე, რაზედაც თანადგომის და დახმარების თანხმობა მიიღო. საუბრისას განხილულ იქნა სასაზღვრო ვაჭრობის რეჟიმისა და ბათუმში საავადმყოფოს აშენების საკითხები.
მასალის გამოყენების პირობები