გენადი ონიშენკომ ქართულ ლიმონათს რუსული ბაზრის კარი გაუხსნა. როგორც სააგენტო "ჯი-ეიჩ-ენს" "ქართული ლუდის კომპანიის" კომერციულმა დირექტორმა კახა პაიჭაძემ განუცხადა, საგურამოში ახლახანს გახსნილი ლუდსახარში "ზედაზენის" პროდუქცია უკვე რუსულ ბაზარზე გაიგზავნა. პირველ ეტაპზე საუბარია "ზედაზენის" ლიმონათზე და როგორც კახა პაიჭაძე განმარტავს, რუსეთში საწყის ეტაპზე 45 ათასი ბოთლი ლიმონათი გაიგზავნა. "ქართული ლუდის კომპანიის" ლიმონათს დისტრიბუციას რუსულ ბაზარზე, რუსული კომპანია "მირ ნაპიტკოვ"-ი განახორციელებს, რომელიც ქართულ ლიმონათს მოსკოვსა და მოსკოვის ოლქში გაყიდის.
როგორც "ქართული ლუდის კომპანიის" კომერციული დირექტორი კახა პაიჭაძე აცხადებს, ლუდსახარში "ზედაზენის" პროდუქცია მალე აზერბაიჯანში, უკრაინასა და ბელორუსიაში გაიყიდება. ამ მიზნით ქართულს კომპანიას კონტრაქტები უკვე გაფორმებული აქვს. ექსპორტთან დაკავშირებით მოლაპარაკებები მიმდინარეობს ასევე ესპანეთის, კვიპროსისა და საბერძნეთის კომპანიებთან.
შეგახსენებთ, რომ ახლაგახსნილ საწარმოში ჩეხი ტექნოლოგების მეთვალყურეობით, უმაღლესი ხარისხის ლუდსა და რამდენიმე სახეობის ლიმონათს აწარმოებენ."ზედაზენის" დადგმული სიმძლავრე წელიწადში 400 ათასი ჰექტოლიტრი ლუდის და 300 ათასი ჰექტოლიტრი ლიმონათის წარმოებაა.
საწარმო მთლიანად ქართული ინვესტიციით აშენდა, რისთვისაც 32 მილიონზე მეტი ევრო დაიხარჯა. სააქციო საზოგადოებამ „ქართული ლუდის კომპანია" საწარმოს მშენებლობა 7 თვეში დაასრულა და უახლესი ევროპული ტექნოლოგიებით აღჭურვა. ქარხანაში უკვე 700 ადამიანია დასაქმებული, რომელთაგან 200 იძულებით გადაადგილებული პირია.