სოფლის მეურნეობის მინისტრი ზაზა გოროზია ოფიციალური ვიზიტით ბაქოში იმყოფებოდა, სადაც FAO-ს (გაერთიანებული ერების სურსათისა და სოფლის მეურნეობის ორგანიზაცია) 28-ე ევროპის რეგიონალურ კონფერენციაში მიიღო მონაწილეობა. კონფერენციაზე რეგიონში სურსათის უვნებლობის კუთხით არსებული მდგომარეობა შეაფასეს და ორგანიზაციის საქმიანობის მრავალწლიანი სამოქმედო გეგმა განიხილეს. ვიზიტის ფარგლებში, ზაზა გოროზია გაეროს სურსათისა და სოფლის მეურნეობის ორგანიზაციის (FAO) გენერალურ დირექტორს ჟოზე გრაზიანო და სილვას შეხვდა. მხარეებმა საქართველოს სოფლის მეურნეობის განვითარების სტარტეგიის შემუშავებაში FAO-ს მხარდაჭერის საკითხი განიხილეს და ტექნიკური დახმარების პროექტების განხორციელების შესახებ იმსჯელეს. მოლაპარაკების შედეგად FAO-ს მაღაზიათა ქსელში ქართული ღვინის განთავსება გადაწყდა და ჟოზე გრაზიანო და სილვას საქართველოში ვიზიტიც დაიგეგმა. "ბაქოს კონფერენციას საქართველოსთვის განსაკუთრებით მნიშვნელობა ჰქონდა. აქ გამართულ შეხვედრებზე ბევრი საინტერესო ინიციატივა გამოითქვა და საფუძველი ჩაეყარა აგრარულ სექტორში ურთიერთობების გაღმავებას ჩვენი ქვეყნისთვის სტრატეგიულ პარტნიორებთან. ასევე გადაწყდა, რომ საქართველოს უნგრეთის, პოლონეთისა და ესტონეთის სოფლის მეურნეობის მინისტრები და ფაოს გენერალური მდივანი ეწვევიან. ეს ვიზიტები ბევრი პოზიტიური პროექტის დაგეგმვასა და განხორციელებას შეუწყობს ხელს", განუცხადა ზაზა გოროზიამ ჟურნალისტებს. საქართველოს სოფლის მეურნეობის მინისტრი ორმხრივი ფორმატის ფარგლებში პოლონელ, უნგრელ და ესტონელ კოლეგებს შეხვდა. მოლაპარაკებებზე ქვეყნებს შორის სოფლის მეურნეობის სფეროში თანამშრომლობის გაღრმავების, გამოცდილების გაზიარების, სავაჭრო ურთიერთობების გაფართოების და ქართული პროდუქციის ექსპორტის გაზრდის საკითხები განიხილეს. ესტონელ კოლეგასთან ჰელირ-ვარდორ სიდერთან შეთანხმებით, ქართველი სტუდენტების ესტონეთის პროფესიული განათლების ცენტრებში გადამზადების საკითხიც გადაწყდა. ასევე, დაიგეგმა ესტონეთსა და პოლონეთში ქართული დღეების ჩატარება.
