საქართველოს ბანკმა და საქართველოში ერთ-ერთმა ყველაზე მსხვილმა ჯგუფმა ვისოლმა ურთიერთთანამშრომლობის მემორანდუმი გააფორმეს. მემორანდუმის თანახმად, საქართველოს ბანკი აფართოვებს ექსპრესის სერვისცენტრების ქსელს და ვისოლის ჯგუფის შვილობილ, „სმარტის" ყველა სუპერმარკეტში განათავსებს ექსპრესის ერთ ფილიალს. ორი უმსხვილესი კომპანიის თანამშრომლობის შედეგად, მომხმარებელი მიიღებს სწრაფ და მოსახერხებელ მომსახურებას, მისთვის ყველაზე ხელსაყრელ ადგილას. მომხმარებელს შესაძლებლობა ექნება, 24 საათის განმავლობაში ნებისმიერ დროს, ერთდროულად შეიძინოს პროდუქცია „სმარტის" სუპერმარკეტში და ისარგებლოს ექსპრესის მოსმხურებით, სადაც საბანკო ოპერაციებს განახორციელებს. სმარტის სუპერმარკეტის კარგად განვითარებულ ქსელში საქართველოს ბანკის ექსპრესის სერვისცენტრების განთავსება, საშუალებას მისცემს მომხმარებელს გზაში მყოფსაც კი, ისარგებლოს საბანკო მომსახურებით, რადგანაც სერვისცენტრი აღმოსავლეთ-დასავლეთის ჩქაროსნული ავტომაგისტრალის მიმდებარედ არსებულ სმარტის სუპერმარკეტშიც დახვდება.
საქართველოს ბანკის ექსპრესის სერვისცენტრები დაყოფილია ორ ზონად - მომხმარებელს ემსახურებიან როგორც მოლარე ოპერატორები, ასევე არსებობს თვითმომსახურების ზონა, სადაც მომხმარებელი 24 საათის განმავლობაში შეძლებს ისარგებლოს ინტერნეტბანკის ტერმინალით, თვითმომსახურების ტერმინალით IPAY და ბანკომატით. აღსანიშნავია, რომ ექსპრესის სერვისცენტრების მომსახურების ზონა, სადაც მომხმარებელს მოლარე-ოპერატორები მოემსახურებიან, ხელმისაწვდომია ყოველდღე, დილის 900 საათიდან 2100 საათამდე და შაბათ-კვირას 1000 საათიდან 1800 საათამდე. ექსპრესის სერვისცენტრებში მომხმარებელი სწრაფად და მარტივად შეძლებს სარგებლობას სპეციალურად ექსპრესისთვის შექმნილი პროდუქტებით - „ექსპრესპაკეტი" (რომელიც შეიცავს ექსპრესბარათს, მულტისავალუტო ანგარიშს, ინტერნეტბანკისა და სმს ბანკის მომსახურებას); „ექსპრესანაბარი" და „ექსპრესკრედიტი"; ისევე როგორც, საქართველოს ბანკის სხვა პროდუქტების მოხმარებას, როგორიცაა: American Express Blue Card-ის განაცხადის შევსება/დამუშავება, მობილბანკის, ტელეფონბანკის, მუდმივი საგადასახადო დავალების, ავტომატური გადახდების, პლასტიკური ბარათის დაზღვევისა და ელექტრონული ყულაბის მომსახურების ჩართვა.
„ექსპრესის სერვისცენტრების განთავსება დინამიურად მზარდი „სმარტის" სუპერმარკეტების ქსელში, კიდევ უფრო ხელმისაწვდომს გახდის საბანკო მომსახურებას ჩვენი მომხმარებლისთვის და საშუალებას მისცემს, მათთვის სასურველ დროს და ადგილას მიიღონ საბანკო სერვისი ყველაზე სწრაფად და მარტივად. ასევე მინდა ავღნიშნო ექსპრესის 24 საათიანი ზონის არსებობა, სადაც მომხმაებელს ხვდება ონლაინ საბანკო მომსახურების სრული სპექტრი- ინტერნეტბანკი, თვითმომსახურების ტერმინალი და ბანკომატი," განაცხადა საქართველოს ბანკის გენერალურმა დირექტორმა, ირაკლი გილაურმა.
`"ვისოლ ჯგუფი მუდმივად ზრუნავს მომხმარებლის მომსახურების სრულყოფაზე და მათთვის სრული კომფორტის შექმნაზე. სუპერმარკეტების ქსელი „სმარტი" საქართველოში მომსახურების ახალ სტანდარტებს ამკვიდრებს. "სმარტი" ძირითადად სავაჭრო ცენტრებად ყალიბდება და მომხმარებლებს საშუალება აქვთ არა მხოლოდ უმალესი ხარისხის პროდუქტების ფართო არჩევანითა და მომსახურების მაღალი ხარისხით ისარგებლონ, არამედ მარტივად მიიღონ მათთვის საჭირო დამატებითი მომსახურება საქართველოს ბანკში და სხვა ობიექტებში„, - განაცხადა ვისოლ ჯგუფის პრეზიდენტმა სოსო ფხაკაძემ.
საქართველოს ბანკის ექსპრესის ქსელი სადღეისოდ წარმოდგენილია 15 სერვისცენტრით.
„სმარტი" გამორჩეულია ბაზარზე უმაღლესი ხარისხის პროდუქტის ფართო არჩევანითა და მომსახურების ევროპული სტანდარტებით. დღესდღეობით „სმარტს" დაახლოებით 15 ექსკლუზიური კონტრაქტი აქვს ევროპელ მომწოდებლებთან. ვისოლ ჯგუფმა „სმარტის" ქსელის განვითარება 2010 წელს დაიწყო. „სმარტის" სავაჭრო ცენტრები დღესდღეობით წარმატებით ფუნქციონირებს აღმაშენებლის ხეივნის მე-13 კილომეტრზე, ვაზისუბნის მეორე მიკრორაიონში, მარნეულში, ყვარელსა და ჩქაროსნული ავტომაგისტრალის გორის მონაკვეთზე.