თონეების, სალონებისა და სოლარიუმების შემდეგ ფიქსირებული გადასახადი საცხობებსაც დაუწესდებათ. როგორც სააგენტო "ჯი-ეიჩ-ენთან" საუბრისას, შემოსავლების სამსახურის უფროსმა ჯაბა ებანოიძემ განაცხადა, სამსახური ინტენსიურად მუშაობს საცხობებისათვის ფიქსირებული გადასახადის დაწესებაზე.
ჯაბა ებანოიძის განმარტებით, ამ დროისათვის თუ რა მოცულობის ფიქსირებული გადასახადები დაუწესდებათ საცხობებს ჯერ უცნობია, რადგანაც პროექტის შემუშავებაზე შემოსავლების სამსახურში ინტენსიური მუშაობა მიმდინარეობს და საბოლოო გადაწყვეტილება ამ დროისათვის მიღებული არ არის.
შეგახსენებთ, რომ მთავრობის დადგენილების თანახმად, მცირე მეწარმეებისთვის თითოეულ თონეზე ფიქსირებული გადასახადის სახით თვეში 50 ლარი დაწესდა. თითოეულ სკამზე 50 ლარის გადახდა უწევთ სილამაზის სალონებსაც, რომლებმაც დაბეგვრის რეჟიმად ფიქსირებულ გადასახადზე გადასვლა ამჯობინეს. სალონები მანიკურისა და პედიკურის ერთ მაგიდაზე კი თვეში 30 ლარს იხდიან.
უკვე ცნობილია, რომ ფიქსრებული გადასახადი სოლარიუმის ერთ კაბინაზე თვეში - 70 ლარი იქნება.