,,საგადასახადო კოდექსში,, დაგეგმილი ცვლილებებით, ოკუპირებული ტერიტორიების მიმდებარე მიწების დავალიანების ჩამოწერა გათვალისწინებული არ არის. ამის შესახებ ჟურნალისტებთან განმარტება ფინანსთა მინისტრის მოადგილემ რუსუდან კემულარიამ გააკეთა.
მისი თქმით, ცვლილებათა კანონპროექტი ითვალისწინებს ოკუპირებული ტერიტორიების მიმდებარე მიწის ნაკვეთების იმ მესაკუთრეების და მფლობელების გათავისუფლებას მიწის გადასახადისგან, რომლებიც სახიფათო ვითარების გამო მიწის დამუშავებას ვერ ახერხებენ და ამის შესახებ თვითმმართველი ორგანოს წევრის მიერ გაცემული ცნობა ექნებათ.
რაც შეეხება უკვე დაგროვილი დავალიანების ჩამოწერას, კემულარიას განცხადებით, აღნიშნული კანონპროექტი ამას არ ითვალისწინებს.
ოკუპირებული ტერიტორიების მიმდებარე მიწების ქონების გადასახადისგან გათავისუფლება ,,ქრისტიან-დემოკრატებმა" მოითხოვეს.
ფრაქციაში აცხადებენ, რომ მოსახლეობას 2008 წლის აგვისტოს ომის შემდეგ დავალიანების სახით, ასეულობით ლარი დაუგროვდა.