დღეს, საჯარო რეესტრის თავმჯდომარემ სოსო წიქარიშვილმა პოპულარულ საძიებო სისტემა Google Earth-ში აღმაშენებლის გამზირის პანორამულ გალერეაზე მუშაობის შედეგები წარადგინა.
საჯარო რეესტრი Google Earth-ში ახალ პროექტს ახორციელებს. სულ მალე, Google Earth-ზე შესაძლებელი იქნება სხვადასხვა შენობებისა და ნაგებობების ე.წ. 3D (3 განზომილება) ფორმატში ნახვა, ასევე, სხვადასხვა ადგილმდებარეობების (ქუჩა, მოედანი და ა.შ.) პანორამების დათვალიერება.
Google Earth-ზე დედაქალაქის ფოტოგალერეის დასატანად, საჯარო რეესტრის სპეცილური ჯგუფი დაახლოებით ერთი თვეა აწარმოებს პანორამულ გადაღებებს, გუგლის რუკაზე ტვირთავს 3-განზომილებიან გამოსახულებებს. საწყის ეტაპზე, მიმდინარეობს მუშაობა თბილისის რეაბილიტირებული ნაწილის პანორამული გალერეის შესაქმნელად (განახლებული აღმაშენებლის გამზირი, კალა უბანი...). ეტაპობრივად Google Earth-ზე თბილისის ცენტრალური ქუჩები და საზოგადოებრივი მნიშვნელობის ობიექტების პანორამული გალერეაც განთავსდება.
მსოფლიოში პოპულარულ Google Earth-ის პროგრამაში 3D გამოსახულებების და პანორამული ფოტოების განთავსება განსაკუთრებით მნიშვნელოვანია ქვეყანაში ტურიზმის განვითარებისთვის. Google Earth ტურისტებს მაქსიმალურად ამომწურავ ინფორმაციას აწვდის გადაადგილების საშუალებებისა და განთავსების ადგილების შესახებ, აძლევს შესაძლებლობას არა მხოლოდ მარტივად და სწრაფად მოიძიონ ქუჩები, შენობები თუ ნაგებობები, არამედ დაათვალიერონ მათთვის საინტერესო ობიექტები 3-განზომილებიან ფორმატში, დაათვალიერონ ქუჩების თუ მოედნების პანორამები.
Google Earth-ის პროგრამის ინსტრუმენტები იძლევა სივრცითი ანალიზის, ობიექტებს შორის მანძილის განსაზღვრის, კონკრეტული ადგილის მოახლოება-დაშორების (ზუმირება) საშუალებას.
Google Earth პანორამული გალერეის და 3-განზომილებიანი გამოსახულებების დატანა საჯარო რეესტრის რიგით მეორე პროექტია. სულ ცოტა ხნის წინ, საჯარო რეესტრმა მუშაობა დაასრულა Google Maps-ზე საქართველოს შესახებ დეტალური სივრცობრივი მონაცემები განსათავსებლად.
საჯარო რეესტრში ეტაპობრივად იგეგმება Google Earth-ზე საქართველოს სხვა ქალაქების და მუნიციპალიტეტების (სიღნაღი, ბათუმი, ანაკლია) დატანაც.
Google Earth (ინგლ. Earth - დედამიწა) - კომპანია Google-ის პროექტია, რომლის მეშვეობით ინტერნეტში მოთავსდა დედამიწის მთელი ზედაპირის სატელიტური ფოტოსურათები.