ფრაქცია „ქრისტიან-დემოკრატები" ოკუპირებული ტერიტორიების მიმდებარე მიწების ქონების გადასახადისგან გათავისუფლებას ხელისუფლების მხრიდან პოზიტიურ ნაბიჯად აფასებენ.
როგორც ფრაქციის თავმჯდომარემ გიორგი ახვლედიანმა, დღეს გამართულ ბრიფინგზე განაცხადა, 2008 წლის აგვისტოს ომის შემდეგ, ადგილობრივებმა გორის მიმდებარე ტერიტორიაზე 520 ჰექტარი სახნავ-სათესი მიწა დაკარგეს.
მისი თქმით, მიუხედავად იმისა, რომ მათ მიწების დამუშავებაზე ხელი არ მიუწვდებოდათ, სახელმწიფო მიწის გადასახადს მაინც აკისრებდა და წლების განმავლობაში, გადასახადი და დავალიანება ასეულობით ლარს უტოლდებოდა.
„ქრისტიან-დემოკრატები, მოსახლეობისთვის ამ დავალიანების ჩამოწერას ვითხოვდით, რადგან ასეულობით ადამიანი ამ კურიოზული გადასახადისგან უნდა გათავისუფლდეს"- აღნიშნა ახვლედინმა და "საგადასახადო კოდექსში" შესატან ცვლილებებს პოზიტიური უწოდა.
პირების, ოკუპირებული ტერიტორიების მიმდებარე მიწების ქონების გადასახადისგან გათავისუფლებას "საგადასახადო კოდექსში" შესატანი ცვლილებები ითვალისწინებს. კანონპროექტით, ჩამოწერას დაექვემდებარება „ოკუპირებული ტერიტორიების შესახებ" საქართველოს კანონით განსაზღვრულ ტერიტორიებზე არსებული ქონების (მათ შორის, მიწის) მიხედვით დარიცხული და გადაუხდელი ქონების გადასახადი, მასზე დარიცხული საურავი და ჯარიმა.