ვისოლ ჯგუფი ქართული სპორტის განვითარებისათვის ინვესტიციებს განაგრძობს და ამიერიდან სამტრედიის ეროსი მანჯგალაძის სახელობის სტადიონის რეაბილიტაციაზეც იზრუნებს.
სარეაბილიტაციო სამუშაოები რამდენიმე მიმართულებით განხორციელდება. ვისოლ ჯგუფის ინიციატივითა და დაფინანსებით განახლდება სტადიონის ბუნებრივი საფარი, გაკეთდება მოედნის სარწყავი სისტემა, სტადიონის მოვლაში ჩაერთვებიან აგრონომები და სტადიონის პერსონალი გადამზადდება, მოწესრიგდება ფან-ზონა და გულშემატკივრებისათვის დაიგება 1500 ახალი სავარძელი. რეაბილიტაცია ჩაუარდება ასევე სტადიონის გარე პერიმეტრსაც.
„იმერეთის რეგიონში ინტენსიურად ვმუშაობთ - ავაშენეთ ეკლესია ზესტაფონში, მხარს ვუჭერთ "ტორპედო ქუთაისს", რადგანაც წარმოშობით იმერეთიდან ვართ, გვინდა ამ რეგიონის განვითარებაში განსაკუთრებული წვლილი შევიტანოთ. როგორც ცნობილია, "ვისოლს" სამტრედიაში ყველაზე დიდი სახმელეთო ნავთობტერმინალია აქვს საქართველოში. სამტრედიის სტადიონი და საფეხბურთო კლუბი ახლა ისე საჭიროებს დახმარებას, როგორც არასოდეს. სწორედ ამიტომ გადავწყვიტეთ სამტრედიელ გულშემატკივარს სიურპრიზი გავუკეთოთ და მათ განახლებული სტადიონი შევთავაზოთ. სამტრედიის სტადიონის რეაბილიტაციით მცირე წვლილს შევიტანთ ქართული სპორტის განვითარებისათვის," - აცხადებს ლევან ფხაკაძე, ვისოლის ერთ-ერთი დამფუძნებელი.
ვისოლ ჯგუფი ერთადერთი ბიზნესია საქართველოში, რომელმაც სპორტის განვითარებისათვის უკვე 25 მილიონ ლარზე მეტი ინვესტიცია განახორციელა.
