ივ. ჯავახიშვილის სახელობის თბილისის სახელმწიფო უნივერსიტეტის ჰუმანიტარულ მეცნიერებათა ფაკულტეტმა დედა ენის დღესთან დაკავშირებით ირანელი გრაფიკოსის საჰარ ეშყი-სანის ნამუშევრების გამოფენა "ქართულ ასოთა საიდუმლო" მოაწყო.
გამოფენის გახსნას თსუ-ის რექტორი ალექსანდრე კვიტაშვილი და ირანის ისლამური რესპუბლიკის ელჩი საქართველოში მაჯიდ სამადზადე საბერი დაესწრნენ.
ირანელი გრაფიკოსი რამდენიმე წლის წინ საქართველოში მოგზაურობისას გაეცნო ქართულ ანბანს.
"საქართველოში მოვიხიბლე ქართული ანბანის განსაკუთრებული ფორმით და კალიგრაფიული შესაძლებლობებით, ძალიან მომეწონა ქართული ხვეულები. პროფესიით გრაფიკოს-დიზაინერი ვარ. ამიტომ გადავწყვიტე ქართულ ანბანზე შემექმნა ტიპოგრაფიული ნაწარმოებები. გამოფენის ორგანიზებაში დამეხმარა ირანში საქართველოს საელჩოს კულტურის მრჩეველი ნიკოლოზ ნახუცრიშვილი", - აღნიშნა საჰარ ეშყი-სანიმ.
ირანის ელჩის მაჯიდ სამადზადე საბერის თქმით, "ირანის ბუნება და ხალხი ისეთივე მრავალფეროვანია, როგორც საქართველოსი. ამანაც განაპირობა ირანელი გრაფიკოსის დაინტერესება ქართული ანბანით".
კვიტაშვილის განცხადებით, თსუ ყოველწლიურად აღნიშნავს დედა ენის დღეს.
"წელს დედა ენის დღესთან დაკავშირებით უნივერსიტეტში ირანელი გრაფიკოსის ძალიან საინტერესო გამოფენა გაიხსნა. გამოფენა იმითაცაა საინტერესო, რომ ნებისმიერ ჩვენგანს საშუალება ეძლევა სულ სხვა თვალით შეხედოს ქართულ ანბანს", - განაცხადა კვიტაშვილმა.
გამოფენა 20 აპრილამდე გასტანს.