ხვალ, 12 აპრილს, ტაძრებში დიდი ხუთშაბათის მსახურება შესრულდება. სრულიად საქართველოს კათალიკოს-პატრიარქი, მცხეთა-თბილისის მთვარეპისკოპოსი, იჭვინთისა და ცხუმ-აფხაზეთის მიტროპოლიტი, უწმინდესი და უნეტარესი ილია მეორე წირვას ყოვლადწმინდა სამების საპატრიარქო ტაძარში აღავლენს.
წირვის დასრულების შემდეგ ფეხთბანვის წესი შესრულდება, პატრიარქი მსახურებაში მონაწილე 12 სასულიერო პირს ფეხს დაბანს.
დიდ ხუთშაბათს ტაძრებში 12-გზის სახარება იკითხება. სამების საპატრიარქო ტაძარში 12-გზის სახარების კითხვა საღამოს, 18:00 საათზე დაიწყება. წმინდა წერილიდან 12-ჯერ წაიკითხება ადგილები იესო ქრისტეს ცხოვრებისა და ჯვარცმის შესახებ.
ვნების შვიდეულში დიდი ხუთშაბათი განსაკუთრებული დღეა. წმინდა სახარების მიხედვით, ამ დღეს მაცხოვარმა თავის მოწაფეებთან ერთად ბოლო პასექი და ფეხთბანვა აღასრულა. უფალმა მოწაფეები ამ დღეს პირველად აზიარა და ევქარისტიის საიდუმლო დააწესა. პასექის ჟამს მაცხოვარმა მიანიშნა, რომ ერთ-ერთი მოწაფე გასცემდა. ეს მოწაფე იუდა ისკარიოტელი აღმოჩნდა.
